درباره من

تبریزه باخیرام گؤزلریم دولور

سس سیزلییی جانیمی سیخیر

دورقونلوغو اوزور منی

بعضا ً تانیمیرام اینسانلارینی

بعضا ً ده تانیدیغیمی سانیرام

بیرده اونلارا آنلادا بیلسم اؤزومو...!


تبریزه باخیرام

سوقاقلاری قدر قارالیر باخیشیم

کوچه لری قدر دارالیر اوره ییم

داغلاریندا یوکسه لن فخریم یئنیلیر

قایالاریندا سرتله شن غروروم سینیر

کدرلریم آرتینجا

داغلارینا سیغیناردیم

یئللرینه بوراخاردیم ساچلاریمی

راحاتلاردیم ایچیمی

یئللرینه باخیرام

کیپریکلریم ایسلانیر

گوونله یئریدیگیم یوللاردا آیاقلاریم سوستالیر

گئتمک ایسته دیگیم یئر قالمیر آرتیق

آتدیملاریم توکه نیر


تبریزه باخیرام

تورپاغینا یئریکله ین آنام گلیر عاغلیما

سویونا آند ایچن آتامی خاطیرلاییرام

اللریم تیتره ییر

تاریخ بوقدرمی ده ییشرمیش بیر شهرین اوزونو؟

سنده گیزله نن اینجی لرین پاتلاما زامانی گلمه دیمی؟

قارنیندا بسله نن ایگیدلرین دوغوم آنی چاتمادیمی؟

بوقدرمی قوجالارمیش بیر شهر؟

بوقدرمی...؟


سنه باخیرام

تبریزین بوتون گؤزللیک لری سنده توپلو

ساچلاریمدا چیچکلر آچیر

گؤزلریمه سئوینج دولور

آخ...

بیرده اوره ییمین سول یئرینده کی بو سانجی دینسه یدی

قوجالسایدی کدر

بیرده قانیمدا دولاشیب دوران بو آجی زهر اؤلسه یدی اگر!.  

درج شده در تاریخ ۹۳/۰۳/۰۷ ساعت 21:05

کاربران آنلاین (0)