شعر

عسگر قارداش سنون ئوزون آغ اولسون
یئرون بهشت دورت بیر یانون باغ اولسون
ائل طایفوون باشلاری دا ساغ اولسون
عدالتده سنه قوران اوخویار
صداقتده چوخلو فاته اوخویار

من دئیه رم رحمت سنه آی کیشی

دیری واختی دوزلدردون هر ایشی

یادیمدادی سن سووردون کشمیشی

اوشاغیدیم سندن کشمیش آلاردیم

کیشمیش آلیب جیبلریمه سالاردیم

عسگر قارداش یئرون کالاه قالیبدی
دوشمانلارون اوردا یووا سالیبدی
قارتال یوواسینی کرکس آلیبدی
یادوندادی اوردا بوستان اکردون
چوخلو اوردان قارپیز خیرچا درردون

گلیب گئچن بوستانون دان یئیردی
گل آتاوا رحمت اولسون دئیردی
طووز ننه گئجه ناغیل دئیردی
بیز ناغیلا یاخشی قولاغ آساردیغ
سونرا اونو باغریمیزا باساردیغ


یازدا گئدیب چایدان بالیغ توتاردیغ
خیردالارین یئنه چایا آتاردیغ
پالتارلاری چئخاردیب بیز سئخاردیغ
سن دئمیشدون عدول قورخما بالیغدی
بالیغلاری یارادان هم خالیغدی

مشهد نبی آت جلوون چئکنده
کئورپه طوبه بوز اوستونه دوشنده
اکبر بابا جوشغون چایی گئچنده
چایی گئچیپ اوردا آوارا قالدی
کور اوغلو تک خان نان انتقام آلدی

عسگر قارداش الیم سندن ئوزولدو
خاطیره لر گوز ئونومده دوزولدو
سنن سونرا منیم قلبیم سوزولدو
یادوندادی سنن قارپیز بولردیک
بیز قارداشلار سنن ئورتو ئولردیک


اوروشلیقلدا حالوانی سن یئمیشدون
 اوروج توتانلارا چوخلو متل دئمیشدون
اوروج اولماغووی هیچ بیلمه میشدون
بایرام گونو بیردن یادووا دوشدو
اهل بیتون چوخ اوجادان گولوشدو




عسگر قارداش ایل بایرامی یادوندا
نوروز گلوقار چیچه گی یادوندا
چرشنبه نین دادی قالمیش یادوندا
ئوت اوستوندن ئوزوموزوآتاردیق
شام دان سونرا باشی آتیب یاتاردیق

قوتلار گلیپ گئجه باغدا ئولاردی
ایتلر هئوروب دام اوستونده دوراردی
ننه م هر گون دام باجانی سولاردی
قوتدان قورخوب کورسویه بیز گیرردیک
آغزیمیزا نه گلسیدی دئیردیک

گئدیب باغدان قیزیل گولو درردی
دام اوستونه گوللری بیز سه رردیک
یورولاندا قوزو تکین مله ردیک
ننه م منه یاغ بله سی وئرردی
قوجاغلیب قوربان اولوم دئیردی

پاییز واختی گئدیب چلتیک بئچردیک
گاهدان چیخیب قیراخدا چای ایچردیک
تل خیرچانی بوستاندا بیز سئچردیک
بوستاندا بیر یاخشی چارداخ قورموشدوق
چلتیک چالیب بالیغ ائشیب بورموشدوق

پیره خانا گولو سودان دولاردی
سوسوز قالان گوللر سارالیب هم سولاردی
اکین چیلر آلاغلاری یولاری
بیزده گئدیب اوردا بوغدا اکردیک
کهلیک تکین یورولاندا سکردیک

بایرام واختی باغدا قوشلار اوخوردو
صونا ننه م سنه جوراب توخوردو
افضل شالین هر باجادان سوخوردو
رستم گیله گئدیب قرشاق سال لادی
حکمو خالا اونا جوراب باغلادی


عسگر قارداش آغا میر حسین یادوندا
کالبای داداش حاج تیمور یادوندا
بیر دی گئوروم نه لر قالیب یادوندا
او سیدین قیزینی سن ایستردون
اونا چوخلو درین سئوگی بسلردو

صونا ننه م یایدا تولوخ چالخاردی
یاغین یئغیب بایدالاردا ساخلاردی
آیرانئنان قوروت دوتوب ساخلاردی
قیش دا یئنه قوروتلاری ازردی
دئوزوملویدو چوخ سوزلره دوزردی

چرشنبه لر گئدیب اودون یئغاردیق
دوست دوشمنی یاخشی یاخشی سئناردیق
باجی قارداشلاری اود باشینا یئغاردیق
بیز دئیردیک آتیل پاتیل چرشنبه
قیزیل گول تک باختیم آچیل چرشنبه

خدا قولو منیم اوجا بوی بابام
هیکللی ساقالی تولوستوی بابام
یاس گونون ایله ردی بیزه توی بابام
هر گون بیزی قوجاخلیب ئوپردی
آتامیزی یادا سالیب گوزونن یاش توکردی


قیزیل ئوزن چایی آشیب داشاندا
سللر سولار شاخ شاخ گلیب آخاندا
ائللر اونا صف باغلایب باخاندا
چیغیراردیق آی چای گلدی قاچاردیق
بیل گوتوروب شاما ساری قاچاردیق

چای گلردی بندیمیزی یئخاردی
بندی یخیب کونلوموزو سیخاردی
کتدیلرین آخیرینا چیخاردی
سون چالیب یئنی دن بند باساردیق
آرخ ایشلیپ تزه دن سو آچاردیق

قیشدا کنده بیر خیلی قار یاغاردی
داغ باشینا باخیب گوردوک آغاردی
طووز ننه اینک لری ساغاردی
خدا قولو مالارا یئم توکردی
قاپ باجانی چوخ باسدئریب بوکردی