درباره من

چاره سیز خسته لرین ، دردینه درمان آنادی
دفتر عشق و وفا ، مشقینه پایان آنادی

سینه سی دشت بلا ، آتش بحراندا یانیر
سارالان یاز گولی تک ، تشنه ی باران آنادی

هر بلا درده دوزر ، شرط محبتده اوزی
گر مصیبت داغ اولا ، صبریده طوفان آنادی

عشق پروانه سی تک ، شمع ائولاده گئنه
یاندیران بال و پرین ، عاشق گریان آنادی

آی دئسون اوخشاری وار ، اولدوزا چوخ بنزی وار
گونی خجلتده قویان ، دورّ بداخشان آنادی

اوکی هر صبحه کیمی ، یاتمادی غمنن گئجه لر
سنه لای لای اوخویان ، بلبل نالان آنادی

شاه لیقین شیوه سی وار ، مَسندی مین لشگری وار
تاج و تخت سیز جاهانا ، سرور و سلطان آنادی

منی حیران ائلییه ن ، دنیادا بیر مسئله دی
نییه ائولاد اوتینا ، دنیاسی تالان آنادی

آناوین قدرینی بیل ، زاهد اگر شاه اولاسان
چون امیبسن سوتینی ، چشمه ی احسان آنادی  

درج شده در تاریخ ۹۳/۰۹/۰۸ ساعت 23:43

کاربران آنلاین (0)