بس سنه کیم آغلایاجاق؟

 

گون گلجک من اؤلنده چوخ دوداقلار بوزوله جک

 

حئییف دئیه گوزیاشلاری یاناقلاردان سوزوله جک

 

قاتار – قاتار میصراعلاریم دوداقلاردا دوزوله جک

 

آیریلیغیم چوخ اوره یی چالین _ چارپاز داغلایاجاق

 

         

بس سنه کیم آغلایاجاق؟

 

 

 مجنون اولوب قالاسی یام،محبتین چؤلونده من

 

حسرتلره دؤنه سی یم  عشق اهلی نین دیلینده من

 

چینار اولوب بیته سی یم  زامانلارین یولوندا من

 

هئیکلله نن عومروم گونوم عصیرلری حاقلایاجاق

 

        

بس سنه کیم آغلایاجاق؟

 

 

چوخ گزمیشم دوستلاریملا بوداغلارین  اته یینده

 

مین_ مین  اؤلمز  خاطیره م  وار هر گولونده ،چیچه یینده

 

نیسگیل لریم چالیندیقجا چوبانلارین توته یینده

 

یولدان اؤتن هر یولچونو  اختیارسیز ساخلایاجاق

 

      

بس سنه کیم آغلایاجاق؟

 

 

بیر کؤز کیمی اته یینده  ساخلار منی داییم کولوم

 

هر باهاردا چیچک آچار، هر پاییزدا سولان گولوم

 

بوینون   ایهَ ن  بنووشه لر آغلار منه ظولوم_ظولوم

 

منیم آرزوم خالقین عشقی،قیریلدیقی تاغلایاجاق

 

      

بس سنه کیم آغلایاجاق؟

 

 

من عشقیدن یارانمیشام جان باغیشلار یارا یاردا

 

باخ گؤر نئجه نسیمی تک بابالاریم قالدی داردا

 

کرم لریم اوردا یاندی ،له له لریم قالدی قاردا

 

واخت گلجک  آه _ آمانیم  هیجران یولون باغلایاجاق

 

         

بس سنه کیم آغلایاجاق؟