آذربایجان دانیشیر

 ایندی بیر باشقا زاماندیر بوتون اینسان دانیشیر

وارلیغین جار ائله‌ییر عالم ایمکان دانیشیر

من نییه سوسمالییام حاققیمی بیگانه یئیه

من واریمدان دئمه‌سم چوخ‌لاری یوخدان دانیشیر

من او خالقام کی، منیم یوردوم آلوولار یئری‌دیر

آراسان تورپاغیمی اوددان آلوودان دانیشیر

من کوراوغلو یئتیریب ظالیمی محو ائیله‌میشم

یئری گلسه قیلیجیم دوشمانا قان-قان دانیشیر

قهرامان بابکیمین شؤهرتی آفاقی توتوب

اوخوسان تاریخیمین هر واراغی شان دانیشیر

نبیمین آدی گلنده گئنه بی‌ لر اوشه‌ نیر

او قوچاغدان هله ده خان ایله سولطان دانیشیر

من او خالقام کی فیضولی منیم ائولادیم اولوب

بونو تک من دئمیرم گور نئچه دیوان دانیشیر

من نیظامی کیمی اعجاز ائله‌ ین میللتی‌ ام

خور باخان‌لار هله بو حق سؤزه بؤهتان دانیشیر

سیغمایان هر ایکی دونیایه نسیمی ده منم

گؤر نه گؤزدن باخیر او خیلقته هاردان دانیشیر

من او یوردام کی منیم واحیدیمین یوخدو تایی

چوخ درین سؤزلری او ساده و آسان دانیشیر

من او خالقام کی جاهان اهلی سئویر موسیقیمی

من‌ده شؤوکت له سارا جاببار ایله خان دانیشیر

دف ایله تار و کامان ساز ایله سؤزله بالابان

ناغارا، زورنا، توتک سئوملی قارمان دانیشیر

بو نیشان‌لار کی دئدین وصفینه "زاهید" بیلدیک

بو شیرین دیل‌ له بیزه آذربایجان دانیشیر

ابراهیم زاهید خزایری:

 ابراهیم زاهید خزایری 1347-جی گونش ایلینده موغانین گئرمی شهری‌نین تولون کندینده آنادان اولموش و ابتدایی- اورتا تحصیلاتینی دا اؤز دوغما کندینده بیتیرمیشدیر.

او ائله یئنی‌یئتمه چاغ‌لاریندان شعرلر یازماغا و موسیقی ایله ماراقلانماغا باشلامیشدیر.

موللا محمد فیضولی، سئیید عظیم شیروانی و علی آغا واحید کیمی کلاسیک‌لرین و یارادیجیلیغی‌نین اوخوماسی ایله، شعر دونیاسینا قدم قویان گنج شاعیر «ابراهیم زاهید» بیلیم یورد تحصیلی آلیب، دؤولت ایشینده چالیشیب و ایران-عراق ساواشیندا 6 ایله یاخین ایشتیراک ائتمیشدیر.

ایندی ابراهیم زاهید ایران‌دا و آذربایجان‌دا، تانینمیش و سئویلیب-سئچیلمیش شاعیر و موسیقی‌چی‌دیر. اونون یارادیجیلیغیندا بوتون قالب‌لر‌له یاناشی، «غزل» داها اوستونلوک داشیییر. مضمون باخیمیندان دا سئوگی، محبت و اَن اساس وطن‌پرورلیک موضوعسو داها آرتیق گؤزه چارپیر.

ابراهیم زاهیدین «آذربایجان دانیشیر» آدلی بیرینجی کیتابی 2005-نجی ایلده بؤیوک سایدا باکی شهرینده چاپ اولونموش و یوکسک ماراق‌لا قارشیلانمیشدیر.

بو کیتابین تقدیمات مراسیمینده آذربایجانین اَن آدلیم خاننده‌لری حاجی آغاخان عبدالله یئو، تئیمور مصطفی یئو، جابیر عبدالله یئو، فیروز سخاوت، بال اوغلان اشرف اوو، صفر مممد اوو و بیر چوخ صنعت‌کارلار و موغام اوستالاری اولموشدولار.

2006 اینجی ایلده ده «غزل‌لر» آدلی کیتابی باکیدا چاپ اولموشدور.

ابراهیمین عرصه‌یه گلمه‌گینده فیلولوقیا علم‌لری دوکتورو، پروفسور، شاعیر ووقار احمدجاناب‌لاری‌نین چوخ امه‌گی اولموشدور. آنجاق اونون یاردیمی ایله ابراهیمین کیتابی ایشیق اوزو گؤروب و  هم ده شعر نمونه‌لری آذربایجان درگی‌لرینده آردیجیل اولاراق چاپ اولونور و موسیقی نمونه لری آذربایجان تئلئویزیا و رادیو کانال‌لاریندان تئز-تئز سسله‌نیر.