قاییت آتا

آنامیزین گول چؤهره سی سولوبدور
ننه میزین گؤزو یاشلا دولوبدور
بیرده گؤردون قیزین گلین اولوبدور
قاییت آتا بو ائو سنی گؤزله ییر
حسرت ایله آنام سنی گؤزله ییر
بو اوجاقین دوغماسی یوخ یادی یوخ
سن گئدلی سوفره میزین دادی یوخ
عؤمور کئچیب غریبلیگین آدی یوخ
قاییت آتا بو ائو سنی ایسته ییر
حسرت ایله آنام سنی گؤزله ییر
سنسیزلیگه آتا نئجه دؤزوم گل
ائل آراسی گئچمیر داها سؤزوم گل
پول پارانی ایسته میرم اؤزون گل
قاییت آتا بو ائو سنی گؤزله ییر
حسرت ایله باجیم سنی گؤزله ییر
قاپیمیزی نه دؤین وار نه آچان
بو حیتده نه قووان وار نه قاچان
سوروشورلار آتان گلیر بس هاچان
قاییت آتا بو ائل سنی گؤزله ییر
حسرت ایله آنام سنی گؤزله ییر

*******

آتاسی اولانلار قدرینی بیلین
یامان آغیر ایمیش آتاسیز دونیا
اونا سجده قیلین اونا باش اگین
یامان آغیر ایمیش آتاسیز دونیا
قاپیا باخیرام قاپینی آچمیر
شکلینه باخیرام دینمیر دانیشمیر
کؤنلوم یاس ساخلاییب کؤنلوم باریشمیر
یامان آغیر ایمیش آتاسیز دونیا
حیتدن باغچادان گور سسی گئتدی
هر بیر حرارتی نفسی کئتدی
او کوچدو بوداغین کؤلگه سی گئتدی
یامان آغیر ایمیش آتاسیز دونیا
گلن گئدن بیردن بیره آزالدی
باشیمین اوستونو چن دومان آلدی
بوتون آرزولاریم یاریمچیق قالدی
یامان آغیر ایمیش آتاسیز دونیا