اورمو گؤلو

اورمو گؤلو،  نه لر گلیب باشینا ؟

قورودورلار  نییه بو آز یاشینا ؟

قوربان اولوم او دوزلو گؤز یاشینا

نییه سنین گؤزون یاشین سیلن یوخ ؟

آخی ندن سنی درمان ائدن یوخ ؟

اورمو گؤلوم، ندیر سنین گوناهین ؟

یوخدور سنین بیزدن سونرا پناهین

آلمامیسان هئچ بیر اینسانین آهین

سنین سودا کی بیر نفر اؤلن یوخ

آخی ندن سنی درمان ائدن یوخ ؟

بیر زامانلار چیمردیک قوجاغیندا

قویلاناردیق شفالی تورپاغیندا

سوسوز قالیبدیر دیلین ، دوداغیندا

نییه چایلار باغلانیب دیر گلن یوخ ؟

آخی ندن سنی درمان ائدن یوخ ؟

اورمو گؤلوم، اولدون بیزه سن آنا

اینصاف دئیل قویاق اوره یین یانا

اولماز ائولاد کی اؤز آناسین دانا

دوزلو دنیز، سندن کیمسه کوسن یوخ

آخی ندن سنی درمان ائدن یوخ ؟

آذربایجان قلبی سنده دؤیونور

سن اولماسان یوردوم اؤلو گؤرونور

میللت سنسیز باشقا یئره کؤچونور (کوچانده می شوند)

نییه سنین دردینی هئچ بیلن یوخ ؟

ندن آخی سنی درمان ائدن یوخ ؟

دوز یئتدی گون  یاتدیم اورمو گؤلونده

آلدیم سندن ” دوزلو اوغلان ” سؤزونده

اوخویورام سنین آغلار گؤزونده

"آذربایجان گلینینی سئون یوخ ؟

آخی ندن منی درمان ائدن یوخ ؟"

                                                                                                                شاعیر : وحید شکرزاده