دردله بسلنمیش حیکایه / آیهان میانالی

دردله بسلنمیش حیکایه / آیهان میانالی

قافامداکی یاساق سئوگیلیم،
الینی اوز
دونه نین
کؤهنه ناغیلیندان!
بیزیم حیکایه
دردله
بسلنمیش دیر سانکی!
بیر بوخچا بولود
سیخار کن
کؤنلومون یوخسول دوستاغینا
ایچیمده کی
کفن سیز دوشونجه لر
اینتیحار سیناغی ایلا
قوجاقلاشیب
اؤلوم ماهنی سین
یازارلار
اونلار
دردلرین
آرخا کوچه سینده
پیلان سیز
دوغوشون
ایتگینلیگینده
بیر گون
آخشام چاغی
یالقیزلیق
دار آغاجیندان
آسیلیب
اؤله جکلر.
سؤزجوک لریم
بیر به بیر
چؤکوب
قویلانیرلار
هر گئجه
سانکی بیزیم شهرده
کیمسه
ائشیتمه ییر
اولدوزلارین
اینتیحار ناغیلین
اولدوزلارین
آغلاییب
سؤنولمه سین
یاغیشلا قوجاقلاشان
اؤگئی حسرتیم
ایسلادیر
اؤلکه مین یاناغین
گیزلیجه
قوتلاییرام
یاساق بایراغین
سن
بیر اؤلکه ایدین
سورگون چاغیمدا
ایللردیر کی
سوسوب ،
آتامدان قالان سؤزلر،
اؤگسوز
ایلگک لر کیمی
سارماشیق حایاتیمدا !
حسرت دوداغین
اؤپوش سوز
توپراق لا
اؤپوشدورن دورومدا.
بیر موتفاق آغلاییر منی
اوزه ریمده کی
قهوه رنگلی گئییم
شاهیددیر اونا
اؤتری گونلری
اؤلچوسوز یاخان
بیر خان کیمی
بئش قوروش پارایا ساتان دویغو
حله آددیملاییر
یازیق اونودولموش بایرام گونلریمی
دانیشام سا
شوعار
سوس سامدا اینتیحار
و حله آغلاییر شعرلریمده
بیر اینتیحار سیناغی....

#آیهان_میانالی
#دردله_بسلنمیش_حیکایه
#تورکجه_شعر
#آغ_شعر
#یئنی_قاپی

#کرج
04:09
29/04/95

yeniqapi.com/?p=1169

telegram.me/yeniqapi/1070

instagram.com/p/BICbs9whs63