اینتیحار ناغیلین سیناغی/آیهان میانالی

اینتیحار ناغیلین سیناغی/آیهان میانالی

بیر قانادی قانا بورونموش قوش کیمی قوجاغیمیزدان بیر ملک کؤچوب،کئچیب،
تانریلیغین آرخا کوچه‌سینده اینتیحار ائتدی!
سئوگی ائله آغلاییردی سانکی تانری بوشانماق‌دایدی تاریخیمین بوم بوش صفحه‌لرینده،
من یازیردیم یازدان،
قارا قیشین قارانلیق گئجه‌سینده!
یازماز اولسایدیم کئشکه.....
نه یازیم یئتیشدی،قارانلیغین آردیندان،
نه‌ده یازدیغیم مکتوب،اونوتدوغوم سئوگی‌نین اوغروندان!
یازا یازا بورولدوم قیشین آغ یورقانینا
بارماق‌لاریم اوشویوردو کئچمیشیمی
جیزیقلاییردی قارین اوزونو
قیشقیریردی ملک باجینین اینتیحار ناغیلین!
قولاق‌لار بیله دونموشدو حاق سؤزلریمی
گونش شاخیردی،شاختالارین قوجالمیش قوجاغیندان،
أریییردیم هر چاغیم کیمی
یورقان سیز قالیردیم
اوشونتو یئللرین دوشونمز باغریندا
من یازیردیم آغلیمدا،
بارماق‌سیز گله‌ج‍‍َگیمین دردله بسلنمیش حیکایه‌سین.سون گونلرین سون بئش نوقطه‌سینده!
من یازیردیم یازسیز گونلریمین
قیشلانمیش طالعیندن
یازیردیم و یازیردیم....
اینتیحار ناغیلین سیناغیندان!
دن دوشموش ساچلاریمین دونموش اوچوشوندان
یازیردیم،
نه یازیم وار ایدی نه ده یازیلاریم،
یوخودان اویاندیغیم چاغ!

آیهان میانالی