سنسیز

بیر نامه یازیب آغلامیشام دیلدارا بیرده
گل گل بو قَدَر کؤنلومه ویرما یارا بیرده

عشقینده وفا ائیله من زاری اونوتما
آغلاتما منی مئیل ائله مه اغیارا بیرده

سنسیز ائله غم دریاسینین باتمیشیام من
سنسیز بو قَدَر درده تاپیلماز چارا بیرده

سندن اؤتَری من بو قریب اؤلکه ده قالدیم
سنسیز گؤزه لیم گئتمه لی یم من هارا بیرده؟

گل عشقه وفا ائیله اوجالسین باشیمیزدا
قوی هاممی دئسین گلدی مغاندان سارا بیرده

بو عهده وفا ائیله مه گین دیللره دوشسون
اولسون سه گاهین نغمه سی دوشسون تارا بیرده

بولبول همشه ناله ده دی گول فراقیندان
یاز وقتی گولوم بولبولو سالما زارا بیرده

ساچ ساققالیمی سنسیز آغارتدی قارا ایللر
هیجرینده آغارمیش ساچیمی گل دارا بیرده

هر گون منی مین دفعه بو هیجران دارا چکدی
منصورونام ای گول منی چکمه دارا بیرده

هرکیمسه منی گؤردو بئله سویله دی کئچدی
یاز اورتاسی "آذر" نه بوکولموش قارا بیرده

آذراوغلو