کامانچاچی عسکر

آنا دیلیمیزده بیر حکایه

خامنه لی کامانچاچی عسکر چوخ یاخچی کامانچا چالاردی.کامانچانین سیم لری آدام کیمی دیلله نردی.بو کیشی آیری ایش گورمزدی و کئچینه جگی کامانچا چالماقدان ائیدی.
چوخ کندلرین تویونا آپاریلاردی."ملکزاده" کندینده بیر توی وارائیدی.کندین اربابی دا تویدا شرکت ائله میشدی
عسکرین کامانچا چالماقی خوشونا گلدی و اوندان سوروشدو:
اوغلوم،ائله پئشه ن بودور یا آیری ایشده گوررسن؟
عسکر دئدی:
باشقا بیر ایشیم یوخدور،آنجاق تویلاردا،شنلیکلرده کامانچا چالیب بیر ته هر کئچینیرم
ارباب دئییر:
اوروجلوق دا ،محرم آییندا و صفر آییندا کی توی اولماز،اوندا نئجه کئچینیرسن؟
عسکر دئدی:
ائله بیرجور کئچینیرم
ارباب دئدی:
توی قورتاراندان سورا منیم یانیماگل،دئییم سنه ایکی خاروار بوغدا وئرسینلر
ایکی خاروار بوغدا وعده سینی ائشیدن عسکر او گئجه بتر هاوالار چالیر. صاباح توی سوووشاندان سونرا اربابین یانینا گلیب دئییر:
آغا،من گئدیرم
ارباب دئییر:
اوغلوم گئت دا
عسکر گورور اربابدان خبر چیخمادی یئنه ده تکرار ائدیر:
آغا من گئدیرم
ارباب یئنه دئییر:
اوغلوم گئت دا

عسکر اؤز اؤزونه دئییر:
حتما اربابین وئردیگی وعده یادیندان چخیب و اربابا دئییر:
سن گئجه دئدین صاباح گل سنه ایکی خاروار بوغدا وئریم
ارباب دئییر:
اوغلوم ،کئچن گئجه سن بیر هاوا چالدین منیم خوشوما گلدی، منده بیر سؤز دئدیم سنین خوشونا گلدی، داها نه ایکی خاروار بوغدا ایسته مکدیر؟

"گونئی مدنیت اوجاقی" کیتابیندان
یازانی:حسین م. گونئی لی