آرتیق بهانه گتیرمه دن، وظیفه میزی یئرینه یئتیرک + ( دانلود فایل خود آموز تورکی آذربایجانی)

آللاهین بیرلیگینه سیغینیرام و گؤزل آدیلا باشلاییرام.

سایین اوخوجولاری سالاملاییب و اؤز سایغیمی هامینیزا بیلدیریرم.

بو نئچه واختدا کی میانالی سایتیندا قئیدییات کئچیرمیشم (ثبت نام ائتمیشم)، مختلیف مطلبلرده، اؤزللیکله (مخصوصاً)  آنا دیلیمیز، تورکجه قونوسوندا اولان مطلبلرده، دوستلارین بیر سیرا یوروملاری (نظرلری) و دانیشیقلاری منه چوخ منطیقسیز گلیب. او دئدیگیم یوروملاردان نئچه سی بونلارا بنزردیر :

- من خودم تورکم، اما نمی تونم تورکی بخونم وبنویسم.

- بابا خوندن و نوشتن تورکی خیلی سخته و . . .

- خیلی دوست دارم تورکی بنویسم اما نمی تونم.

- کاش منم می تونستم تورکی بنویسم . . .

- درسته تورکی شیرینه ولی خوندنش سخته . . .

. . . !!

بیر باشقا یوروملاردا گؤزمه چارپیب کی آرتیق ایهانت ساییلیدیرلار، هله لیک بو یازیمدا اونلارین جاوابینی وئرمه دن،  واز کئچیرم.

من دئمیرم هر یئرده مطلبلرینیزی و یوروملارینیزی تورکجه یازین. دوزدور، بعضی سؤزلر وار کی فارس و باشقا دیللده اولان وطنداشلاریمیزیندا باشا دوشمه یی گرکدیر. تکجه  بو مطلبلری فارسجا یازمالییق، باشقا مطلبر و یورملاریمیزی آنا دیلیمیزده یازماغیمیز یارارلی (مفید) دیر.

آیدین بللیدیر، تورکجه نی یازیب اوخوماق، فارسجادان داها چوخ آساندیر. (کیم ایسترسه پیام وئرسین، بو سؤزو اونا ثابیت ائدیم). اونودمایاق کی عومورموز بویو فارس دیلینده اوخوموشوق.

یقین هامییا بللیدیر، آنا دیلیمیزده درس اوخوماق بیزیم ان دوغال (طبیعی) حاقلاریمیزدان ساییلیر و 80 ایلدن آرتیقدیر اؤز حاققیمیزدان محروم قالمیشیق. آما بو مسئله آنا دیلیمیزله کوسمه یه و اونو اونوتماغایمیزا عیللت ساییلمیر. سیزجه بو دورومدا (وضعیتده) آرتیق وظیفه میز یوخمو؟ آرتیق آنا دیلیمزده یازیب اوخوماق بیزه لازیم دئییلمی؟

بو بیر گئرچکدیر، بیزلر ادبی دیلیمیزده ساوادسیزیق و یازیلاریمیزدا یانلیشلیق (اشتباه – سهو) چوخ گؤزه چارپیر. " شخصاً من اؤز یازیلاریمدا اولان یانلیشلیقلاری، اؤزللیکله گرامئر، ایملا و قایدا باخیمندان چوپ چوخ اولماسینی بیلیرم و بو جهتدن هامینیزدان عذر ایسته ییرم و خواهیش ائدیرم منیم بو آیدین سهولریمی بیلمه مزلیغیمین آیاغینا وورمایین. "

آما منجه بو سهولر و یانلیشلاریمیز بیزلره نقصان ساییلمیر. چون هئچ بیریمیز آنا دیلیمیزده تکجه بیر کیلاسدا اوخومامیشیق.

بو سؤزومه دیققت ائدین لطفاً:

من بیر فوق دیپلم مدرکینه صاحیب اولاراق، بوتون بو 14 ایل بویوندا فارس دیلینده و ادبییاتیندا تحصیل آدیقلاریمی و اؤیرندیکلریمی بیر طرفده حسابلایاندا و تکجه بو ایکی آی بویوندا، بئش – آلتی تورکجه کیتابی اوخودوقلاریمدان فایدالاندیغیمی، باشقا طرفده حسابلایاندا، تورکجه یازیب اوخوماغیمین، فارسجا یازیب اوخوماغیمدان، داها یاخشی و داها گوجلو اولماغین دوشونورم. (واللاهی معجزه کیمیدیر!!).

و بورادا بوتون اوخوجولارا سؤز وئریرم، سیزده سیناسازسا (اگر امتحان ائتسیز) همن نتیجه یه یئتیشه جکسینیز. سیزده ایکی آی بویوندا، هر گون یاریم ساهات ، چوخ یوخ یالنیز یاریم ساهات، اؤز دیلیمیزه و ادبیاتیمیزا واخت وئرینیز. تورکجه کیتاب اوخوماقلا، اینترنت طریق ایله و باشقا یوللارلا کی اؤزوز راحاتسیز. لطفاً سینایین (سؤزوم دوغرو چیخماسا، آللاهین و سیزین غضبینیزه گیرفتار اولوم).

آرتیق بهانه گتیرمه یک. چون بو قونولاردا قایناقلار چوخدور. بیر نئچه پی دی اف کیتابیدا سیزلره بو آشاغیداکی باغلانتلارلا باغلی، اؤنر (پیشنهاد) وئریرم.

خود آموز تورکی آذربایجانی :

http://www.4shared.com/document/LCGlghcS/sonuncu.html

آنا دیلی نین ناغیلی :

http://www.4shared.com/document/ayoxV-uM/150.html

تورک دیللری نین یئنی تصنیفی ( دوکتور جواد هئیت ) :

http://www.4shared.com/document/HRq_sdpV/160.html

مبانی دستور زبان تورکی آذربایجانی :

http://www.4shared.com/document/EME_McpK/zaban-torki.html

ساوالان :

http://www.4shared.com/document/IC4qyzJq/115.html

یازی قوراللاری – تورک دیلی :

http://www.4shared.com/document/xG7xkkfD/69_online.html

ائلیمیزده گؤزل بیر آتا – بابا سؤزو وار دئییر :

نئچه دیل بیله نه نئچه اینسان دئیرلر، آنا دیلین بیلمه یه نه نئجه اینسان دئیرلر.

دیلیمیز کیمی هئچ نه یی سئومیریک. پس دیلیمیزی اؤیرنمک اوچون، هئچنه دن اسیرگه مه یک (دریغ ائتمه یک).

سیزین باش اوجا یاشاماغینیز منیم اورک دیله ییم دیر.

یاشاسین آذربایجان.