ای پول

ای پول

نور چشمانیم می سان، ای پول، یا جانیم می سان؟

عصمتیم، ناموسوم، عرضیم، غیرتیم، قانیم می سان؟

حرمتیم، فخریم، جلالیم، شوکتیم، شأنیم می سان؟

مصحفیم، مکه م، مدینه م، قبله م، ارکانم می سان؟

مذهبیم، دینیم می، آیینیم می، ایمانیم می سن؟

کئچدی عمروم شغل تحصیلین له موقوف ملال،

درده دوشدوم، بستر حسرتده قالدیم خسته حال،

سنده دیر کؤنلوم یئنه ائتسم جهاندان ارتحال،

سن منیم عمروم، حیاتیم، جوهریم، جانیم می سان؟

مذهبیم، دینیم می، آیینیم می، ایمانیم می سان؟

آه، ظالم، آه کیم، اولدوم یولوندا جان فدا،

بیر دویونجا قییمادیم سندن آلام ذؤوق و صفا،

ایندی وارثلر هجوم آور اولوب یکسر سانا،

وارثین، یاخود منیم مال جیبیشدانیم می سان؟

مذهبیم، دینیم می، آیینیم می، ایمانیم می سان؟

ائیله مز وارثلریم من تک سنی صندوقه درج،

هر بیری ائیلر سنی بیر نوع ایله مین یئرده خرج،

ریستورانلاردا، کلوبلاردا اولارسان هرج و مرج،

هر یئتن چئینر سنی، بیلمم اتیم، قانیم می سان؟

مذهبیم، دینیم می، آیینیم می، ایمانیم می سان؟

سئودیییم، بوندان بئله حین زوالیندیر سنین،

اشبو وجه ایله، کؤنول، جای ملالین دیر سنین،

خاطریم، قلبیم، سریم وقف خیالین دیر سنین،

سن منی مفتون ائدن نازنده جانانیم می سان؟

مذهبیم، دینیم می، آیینیم می، ایمانیم می سان؟

سندن ال چکمزدیم اولسایدی الیمده اقتدار،

لاکن اجباراً اجل ائیلر منی سندن کنار،

جانیم آغزیمدان چیخانجا سؤیله رم بی اختیار:

نور چشمانیم می سن، ای پول، یا جانیم می سان؟

مذهبیم، دینیم می، آیینیم می، ایمانیم می سان