بو چرخ فلک ترسینه دؤوران ائدیر ایندی!

بو چرخ فلک ترسینه دؤوران ائدیر ایندی
 

فعله ده اؤزون داخل انسان ائدیر ایندی
 

اولماز بو کی، هر امره دخالت ائده فعله
 

دؤولتلی اولان یئرده جسارت ائده فعله
 

آسوده نفس چکمه یه حالت ائده فعله
 

یا این کی حقوق اوسته عداوت ائده فعله
 

بو چرخ فلک ترسینه دؤوران ائدیر ایندی
 

فعله ده اؤزون داخل انسان ائدیر ایندی
 

فعله، منه بیر سؤیله، نه دن حرمتین اولسون؟
 

آخر نه سبب سؤز دئمه یه قدرتین اولسون؟
 

ال چک، بالا، دؤولتلیلره خدمتین اولسون
 

آز– چوخ سنه وئردیکلرینه منتین اولسون
 

بو چرخ فلک ترسینه دؤوران ائدیر ایندی
 

فعله ده اؤزون داخل انسان ائدیر ایندی
 

دؤولتلی آماندیر، اؤزونو سالما بلایه
 

فعله سؤزو حق اولسا دا، باخما او صدایه
 

یول وئرمه نفس چکمه یه هرگز فقرایه
 

اؤز شأنینی پوچ ائیله مه هر بی سر و پایه
 

بو چرخ فلک ترسینه دؤوران ائدیر ایندی
 

فعله ده اوزون داخل انسان ائدیر ایندی
 

آلدانما، فقیرین اولاماز عقلی، ذکاسی
 

چون یوخدور اونون سن کیمی پاکیزه لباسی

 

یوخ ثروتی، یوخ دؤولتی، یوخ شالی، عباسی
 

وار کهنه چوخاسی، دخی بیر تکجه قباسی
 

بو چرخ فلک ترسینه دؤوران ائدیر ایندی
 

فعله ده اوزون داخل انسان ائدیر ایندی
 

ایسترسن اگر اولماغا آسوده جهاندا
 

تا اولمیاسان غملره آلوده جهاندا
 

فعله اوزونه باخما بو بیهوده جهاندا
 

اؤز فکرینی چک، اول دخی فرسوده جهاندا

 

بو چرخ فلک ترسینه دؤوران ائدیر ایندی
 

فعله ده اوزون داخل انسان ائدیر ایندی
 

گؤر ملتی نین دردینی، آختارما دواسین
 

ال چکمه یتیمین باشینا، کسمه صداسین
 

زنهار، قویوب دهرده بیر خیر بناسین
 

یاد ائیلمه، شاد ائیله مه ملت فقراسین
 

بو چرخ فلک ترسینه دؤوران ائدیر ایندی
 

فعله ده اوزون داخل انسان ائدیر ایندی

 

 

نظر ویرسون پیس اولماز