دیلنچی

دیلنچی
 

رد اول قاپیدان، آغلاما زار – زار، دیلنچی!
 

واققیلداما بایقوش کیمی، ادبار دیلنچی!
 

بو مجلسیمیز مجلس احسان دیر اگرچی،
 

دوزدوکلریمیز نعمت الوان دیر اگرچی،
 

احسان فقرا کسلره شایان دیر اگرچی،
 

بیر عادت ارثیه دخی وار، دیلنچی!
 

رد اول قاپی دان، آغلاما زار – زار، دیلنچی!
 

دؤولتی لریز، مقصدیمیز عیش و صفادیر،
 

مهمانلاریمیز بوسبوتون ارباب غنادیر،
 

کؤک دور، یئکه دیر، بوینی یوغوندور، نجبادیر،
 

بَی دیر، آغادیر، آغزی دعالی علمادیر،
 

پیشمیشلریمیز مین جوره لذتلی غذادیر،
 

تیکمه گؤزونو مطبخه، بی عار دیلنچی!
 

رد اول قاپی دان، آغلاما زار – زار، دیلنچی!
 

دخلی بیزه نه بوش دا قالیب دست سؤالین؟!
 

یا اینکه آجیندان مله شیر اهلین، عیالین؟!
 

باخ، باخ، نئجه چیرکین دیر او منحوس جمالین!
 

حاخ – توف اوزونه، صورتی مردار دیلنچی!
 

رد اول قاپی دان، آغلاما زار – زار، دیلنچی!
 

دؤولتلی نچین صرف ائدیب اؤز بذل و سخاسین،
 

اعیانی قویوب، دویدورا شهرین فقراسین؟
 

تؤکسون گؤروم آللاه اوزونون شرم و حیاسین!
 

ال چک یاخامیزدان، ایتیل، ادبار دیلنچی!
 

رد اول قاپی دان، آغلاما زار – زار، دیلنچی!
 

بیر دفعه فقیر اولدوغونو آنلا دا، زنهار،
 

دؤولتلی لرین بیشمیشینه اولما هوسکار،
 

یوخسا یئمه یه بیر زادین، اؤل، جانینی قورتار!
 

ائتمه بو قدر بیزلره آزار، دیلنچی!
 

رد اول قاپی دان، آغلاما زار – زار، دیلنچی!
 

فقر اهلی غنی لرله ملاقات ائده بیلمز،
 

دؤولتلی یه انسانلیغین اثبات ائده بیلمز،
 

دؤولتلی فقیر ایله مساوات ائده بیلمز،
 

نقصان گتیره ر شأنینه بوکار، دیلنچی!
 

رد اول قاپی دان، آغلاما زار – زار، دیلنچی!