حوسئینه یئرلر آغلار، گؤیلر آغلار

 

 

 

 

 

 

 

 

 

      حوسئینه یئرلر آغلار ،گؤیلر آغلار

 

بتول و مرتضی، پئیغمبر آغلار»

 

حوسئینین نوحه‌سین دلریش یازاندا

 

مسلمان سهل‌دیر کی کافر آغلار

 

کور اولموش گؤزلرین قان دوتدو شمرین

 

کی گؤرسون اؤز الینده خنجر آغلار

 

حوسئینین کؤینگی زهرا الینده

 

چکر قئیحا قیامت، محشر آغلار

 

آتاندا حرمله اوخ کربلاده

 

گؤرئیدین دوشمن آغلار، لشگر آغلار

 

 

 

قوجاغیندا، گؤرئیدین امِّ لیلا

 

آلیب نعشِ علیِّ اکبر آغلار

 

روباب، نیسگیل دؤشونده، سود گؤرنده

 

علیِّ اصغری یاد ائیلر آغلار

 

باشیندا کاکل اکبر هواسی

 

یئل آغلار، سنبل آغلار، عنبر آغلار

 

یازاندا آل طاها نوحه‌سین من

 

قلم گؤردوم سیزیلدار ، دفتر آغلار

 

علی، شقُّ القمر، محراب تیلیت قان

 

قولاق وئر، مسجید اوخشار، منبر آغلار

 

علیدن «شهریار»، سن بیر اشاره

 

قوجاقلار قبری، مالک اشتر آغلار