گوندهلیک دانیشیقلاریمیزدا، مختلف اینسانلار ایله دانیشیب، سؤز آلیش- وئریشی ائدیریک.
بو اوزدن اؤز دانیشماغیمیزا دوزگون دقت یئتیرمهلیییک.
“دانیشیق لار” دوشونجه لر ایله دویغو لاردا (حس لرده) تاثیر ائدیرلر.
“دوشونجه لر” دویغولار ایله دانیشیقلاردا و “دویغولار” ایسه (نیز) دانیشیق لار ایله دوشونجه لرده اثر قویورلار.
بو اوچ ائدیجیدن (عامل دن) بیرینین اختیارینی ألیمیزه آلا بیلسک، او بیریلری ده کنترل ائده بیلهجهییک.
تانرینین اینسانلارا گؤندردیگی سون ساوچیسی (رسولو)، حضرت-ی محمد (ص) بویوروبلار:
“یاخشی دانیشیق، روزونین چوخالماسینین، عؤمورون اوزانماسینین و ثروتین نهدنی (سببی) ساییلیر”
حضرت علی (ع) ایسه، بویوروبلار: “دیلینه غالب گلن، آماندادیر.”
بیر تورکجه آتا- بابا سؤزو بئله دئییر:
” دیلین سوموگو اولماسا دا، راحاتجا سوموک قیرار.”
باشقا بیر آتا-بابا سؤزو ده بو موضوع دا بئله دئییر:
"قیزیل دیل، یاشیل باشی یئله وئرر.”
ارسطو، اینسانین، اینسان اولدوغونو دانیشدیغیندا بیلیر.
بؤیوک قاندی ایسه دئییر: “سؤزلر تاثیرلیدیر، لازیم و واجب اولماسا، دانیشمایاق.”
اونوتمایاق، اولوملو دوشونمک، چتینلیکلری انکار ائتمک دئییل، اونلاری سایماماقدیر.
بللی اولدوغو کیمی دانیشیق دوغرودان دا بیر معجزه ساییلیر.
بو اوزدن دقت یئتیرسک، دانیشیقلاریمیز ایله چوخلو ایشلری دَییشه بیلهریک. آشاغیدا بعضی اولوملو ( (OLUMLU[مثبت] و اولومسوز (OLUMSUZ) [منفی] دانیشیق نمونهلری اوخویا بیلرسینیز.
![olumlu](http://bilimsesi.com/wp-content/uploads/2015/06/olumlu.jpg)
دئیک (بگوییم) : گوجلو و انرژیلییم.
دئمه یک (نگوییم) : یورقونام.
***
دئیک: من یاخشییام. اعلایام.
دئمه یک: پیس دئییلم.
***
دئیک: تجربهلی اولوبدور.
دئمهیک: اودوزوبدور.
***
دئیک: بو پای سیزین اوچون.
دئمهیک: قابیلی یوخدور.
***
دئیک: یوزده یوز، باشاریلی (موفق) اولارام.
دئمهیک: موفق اولماق چتیندیر.
***
دئیک: اؤیرنمهگین، زامان آپارار.
دئمهیک: هئچواخت اؤیرنمهسن.
***
دئیک: بو مسئلهنی اؤزوم حل ائدرم.
دئمه یک: سنله ایلگیسی یوخدور.
***
دئیک: دینج (آرام) اولون.
دئمهیک: هارای چکمه.
***
دئیک: من ساغ- سالاماتام.
دئمهیک: من مریض دئییلم.
***
دئیک: سیزی شنلیکلرده (شادلیقلاردا) گؤرک.
دئمه یک: سون غمینیز اولسون.
***
دئیک: یاخشی گؤزه رحمت.
دئمهیک: پیس گؤزه لعنت.
***
دئیک: تانری سلامتلیک وئرسین.
دئمه یک: تانری بد وئرمهسین.
***
دئیک: بو ایشدن نه لذت آپاریسان؟
دئمهیک: ندن اذیت ائدیرسن؟
***
دئیک: راحات دئییل.
دئمهیک: چتین دیر.
***
دئیک: باشیم قاریشیقدیر.
دئمهیک: چتینلیکدهیم.
***
دئیک: تانری ایسترسه (ایشناللاه)، سونرا.
دئمهیک: حوصله یوخومدور.
***
دئیک: لطف ائدین.
دئمهیک: گرک.
قایناق:
بیلیم سسی
حاضیرلایان:آغای حسین واحدی