کیتاب تانیتدیرما1

سلام حؤرمتلی و سئویملی دوسلارا

بو گون چئشیدلی ایش گؤروب و کیتاب اوخوماق اوچون بیر گؤزل  و ده یرلی ناغیل کیتابی تانیتدیرماق ایسته ییردیم ،

آدی " ساری گلین،ناغیل توپلوسو"دو

اوُندوققوز ده نه یه یاخین، اوره یه یاتان ناغیل لاری وار ،

من بیرین اؤرنک اوچون بوردا سیز عزیزلره پایلاشیرام ان شاء الله خوشوزا گلن اولا

یئنه چالیشاجایام گله جک گونلرده ده باشقا کیتاب لار

فرق ائتمیر تورک یوخسا باشقا دیل لرده اولا تانیتدیرام و تکجه آماجیم کیتابین اوخوماق آماری شه هریمیزده یوخاری گئتمه ی دیر

سیز عزیزلرده اوخودوغوز کیتابلاردان تانیتدیرساز سئوینه ریک اوغورلار سیزه

کورسوبئلی

چاک چاک .....چاک
قاپینین حلقه‌رزه سسی ائوی بورودو.
کیشی کورسو یورقانین آلتیندان باشینی قالدیریب سگگیز یاشیندا ‌اولان اوغلونا اوز اوتوب دئدی:
_دور گئت گؤر قاپیدا کیمدیر...نه ایستیر..؟؟!
سونرا مینقیلدیا_مینقیلدیا کورسونون پهله سیه سوزوب، یورقانی باشینا چکیب،دئدی:
_آخماقلار..!واخ تاپیبلار..! ایندی بو قارلی هاوادا ایتی وورسان ائشییه چیخماز، گلیبدی تاخ تاخ تاخ!!
اوشاق ایستر- ایستمز آرخالیغینی باشینا چکیب قاپی یا ساری یولا دوشدو. بیرآزدان قاییدیب دئدی:
_قاپیدا بؤیوک بابا دی،آرتیق پالتار ایسته ییر:"چیلله گئجه لری دیر،باغین کره سی چوخ سویوقدو.منه بیرآز پالتاردان،چولدان وئرین."دئییر.
کیشی آروادینین اوزونه باخیب، بیرآز توموب، بیردن چیغیردی:
_‌گؤرسن،بو اؤلموش قوجا جانیمیزدان نه ایستیر...؟! نه زامان بیزدن اَل چکه جک..!؟
سونرا فیکیرله شیب،اوغلونا اوز توتوب دئدی:
_‌گئت میطباخا،کوهنه کورسو بئلینی وئر بابانا.تئز قاییت سویوق وورماسین!
نئچه دیقه گئچدی، اوشاقدان خبر اولمادی. کیشی گؤز قیراقی له ائو قاپیسینا باخیردی. زامان گئچدیکجه اوره‌یینی اووشودوردو.
آرتیق دایانا بیلمه دی.دئیینه دئیینه کورسو آلتیندان ائشییه چیخیب بیر آرخالیق باشینا آتیب، قاپی‌یا ساری یولا دوشدو.فیکیرله شیردی:
"شئیطانا لعنت، اوشاق هاردا قالدی..؟!اولمویا آجیق اوچون،آتام اونو گؤتوروب قاچا؟؟"
قاپینی آچیب،آتاسینی گؤردو دووار‌ دیبینده یئره قیسیلیب اَل لرینی هاف لویور.
آجیقلا سوروشدو:
_ اوشاق نه اولدو..!؟؟
قوجا کیشی باش قالدیریب، سویوخدان سسی تیترییه_تیترییه دئدی:
_ سلام اوغلوم..بیلمیرم اوغلوم..سانیرام گئدیب منه پالتار گتیرسین...
کیشی قاپینی آتانین اوزونه چیرپیب، میطباخا ساری یولا دوشوب میرتلاندی:
_او یئکه لیکده باغی اونا تاپشیرمیشام هله اوتانمیر بو قارلی هاوادا آغزینین سویو آخا_آخا گلیب آرتیق پالتار ایسته ییر..!! اوتانماقدا یاخشی بیر شئی دیر..!
میطباخا چاتیب، میطباخین قاپیسینی آچدی، میطباخین آلا قارانلیق ایشیغیندا اوشاغی گؤردو یئرده اوتوروب کورسوبئلی نی ایکی پاچاسینین آراسیندا آلیب بیر کوت تییه ایله ایکی یئره بولور.قان گؤزلرینه دولاراق چیغیردی:
_ اوغلان نه ائدرسن..!؟؟ نه دن ایکی یه بولورسن..!!؟
اوشاق ، معصوم گؤزلرینی آتاسینا چئویریب محبتلی سسیله دئدی:
_ به آتا..!من بؤیویندن سونرا، سنده گلیب کورسو بئلی ایسترسن،بس من سنه نه وئره جه یم..!؟؟
اودور کی بونو بؤلوب سنه ساخلاییرام...
کیشی نین گؤزلری اوشاغین اوزونده دوندو. بیر سؤز دییه بیلمیردی.
گؤیده ایدی یئره دوشدو.یاتمیش سادا اویاندی.گؤزلری قارالیب دیزلری ایسته مه میش بوکولوب یئره کؤچدو... ایکی قامباچالی باشینا ووردو.ناله سی قولاغا چارپدی:
_ ای وای اوغول من نه ائدیردیم؟!بو گونلر منه ده واریمیش...؟!
آغلامیردی،آما گؤز یاش دامجیلاری اوزوندن آخیب یئره دوشوردولر.
بیردن آیاغا قالخیب قاپی یا ساری قاچدی.قاپینی آچیب اؤکوتور کن آتاسینی یئردن قووزاییب باغرینا باسدی.آتاسینین تیترر اللرینی الینه آلیب اوپر کن اوزونه سورتدو.
_آتا..!من آنلامیردیم...من دوشونموردوم...آتا سنی آللاه ...سنی آنامین روحو، منی باغیشلا... ائو سنین ائوین دیر..ائشیه آتمالی وارسا، منم
منی ائشییه آت..دور گئدک آتا..
آرخالیغی آتاسینین باشینا سالیب، قولتوغوندا آتانی ائوه ساری آپاردی .
قارلارین اوستونده یالنیز بیر ایز گؤرونوردو.