توركجه‏ده سورغو اكي (پسوند سوال)

اولو تانرينين آدي ايله

تانيش اولدوغوموز فارسجادا جومله ني سورغو حالينا گتيرمك اوچون اونون ايلكينه «آيا» آرتيريريق:

«علي به مييانا آمد.» (خبري جومله)

«آيا علي به مييانا آمد؟» (سوالي جومله)

توركجه‏ده 4 حالتلي «مي»* پسوندي فارسجا «آيا»نين قارشيليغي اولا بيلر. ادبي ديليميزده سورغو اكي‏نين اسكي ايللردن بري بوگونوموزه‏ دك ايشله‏نيلمه‏سينه باخماياراق تأسسوفله بوگون، ايستر فارسجانين ايسترسه توركجه ميزين دانيشيق ديلينده بو سورغو اكلردن فايدالانميريق!...

بعضي يازيلاريميزدا باشقا ديللرين سورغو جومله قورولوشونون تأثيرينده توركجه نين بو قونودا داها گوجلو اولماسيني اونودوروق! دئمك فارسجادا «آيا» هميشه جومله نين ايلكينده گلديگيندن ائتكيله‏نه‏رك بيزده بعضاً يانليشجاسينا سورغو اكيني هميشه جومله نين سونونا آرتيريريق و سورغو اكي ايله جومله نين باشقا كلمه لريني ده وورغولايا بيلديگيميزدن خبرسيزيك!

فارسجا سورغو جومله سي ايله توركجه سورغو جومله سي نين فرقي «وورغو» نشانه سينده دير. دئمك فارسجا يازيلي ديلينين بير سورغو جومله سينده هانسي كلمه ني وورغولاديغيميز بللي دئييل آنجاق توركجه‏ده بو مسئله يوخدور و جومله‏ده تك تك كلمه لري وورغولاماق مومكوندور. دولاييسي ايله توركجه‏ده جومله نين اوخونوش لحني داها گؤزل و داها راحات اولور.

«آيا علي به مييانا آمد؟» سوردوغوموزدا «علي»، «مييانا» يوخسا «آمد» كلمه لرين هانسيني وورغولاديغيميز بللي اولمور آنجاق توركجه سورغو اكي ايله بوتون سورغو حالتلريني وورغولايا بيله‏ريك:

1- علي مييانايا گلدي مي؟

2-علي مييانايامي گلدي؟

3- علي مي مييانايا گلدي؟

گؤردويونوز كيمي سورغو اكيني هاردا قوللانماغيميزلا يوخاريداكي 3 جومله نين آنلاملاري دا فرقلي اولور.

سيزجه «آيا مي تواني بخواني؟» جومله سينين (وورغو توانستن اوستونده فرض ائديله‏رك) توركجه قارشيليغي هانسي گزينه دير؟

1- اوخويا بيلرسن؟

2- آيا اوخويا بيلرسن؟

3- اوخويا بيلرسن مي؟

4- اوخويا بيلرمي سن؟

اومورام يارارلي اولموشدور.

*: 4 حالتلي «مي» : توركجه نين آهنگ و اويقارليق قانونلارينا باغلي mı – mi – mu – mü حالتلرينده گله بيلر.

سؤزلوك

اك : پسوند

قارشيليق : معادل

 قونو : موضوع

وورغو : تأكيد / وورغولاماق : تأكيد كردن

آنلام : معني ، مفهوم

ائتكيله نمك : تحت تأثير قرار گرفتن