تورکجه ترحیم اعلامیه سی، ایلگیلی سورونلار، نئچه نمونه

اولو تانری‏نین آدی ایله

هردن یوردداشلاریمیزین بیرسیرا ایشلرینی گؤروب اؤز-اؤزومه اونلاری دانلایاردیم! آنجاق کئچن آیلاردا یانلیش دوشوندویومو آنلادیم!

اؤرنه‏یین، بوگونه قدر دوستلاردان- قوهوم‏لاردان چوخلو توی کارتی دعوتلری آلمیشام. اونلارین یازی‏لارینین فارسجا اولماسی منی دوشوندورردی. دولاییسی ایله اونلارا اؤز دیلینه ده‏یر وئرمه‏ین شخص‏لر گؤزو ایله باخیردیم! آنجاق مسئله‏یه درینله‏شدیییمده یانلیش دوشوندویومو آنلادیم.

بو یازینی دا تورکجه ترحیم اعلامیه‎سی یازماق مجبورییتینده قالدیغیمدان ایلهام آلاراق یازیب سیزینله پایلاشماق ایسته‏دیم.

بیر تورکجه ترحیم اعلامیه‎سی یازدیرماق اوچون شهریمیزده (مییانادا) نئچه اعلامیه چاپ ائدن مرکزلرینه موراجیعه ائتدیم. تأسسوفله هئچ بیرینده تورکجه اعلامیه اؤرنه‏یی یوخ ایدی! آنجاق بعضی‏لری «اؤزونوز باشارسانیز یازین بیز چاپ ائدک» دئییردی‏لر.

نه ایسه! گئدیب اینتئرنئتی آلت- اوست ائله‏دیم! 4-3 نمونه‏دن سونرا باشقا بیرشئی تاپابیلمه‏دیم! تاپدیغیم نمونه‏لرده بیزیم شهریمیزده (مییانادا) عرف اولان قالیبله اویغون دئییل ایدی!

((منجه بو نوع اعلامیه‏لره، تورکجه قیرامئرینه اویغون بیر قالیب طراحی اولونمالی و خالقیمیزین طرفیندن داها گئنیش مقیاسدا قارشیلانمالی‏دیر))

اؤنجه اؤزوم، قیرامئریمیزله اویغون تورکجه ترحیم اعلامیه‎سی یازدیم. آنجاق کوتله‏نین گؤزو عادت ائتدییی ترحیم اعلامیه‏لرله چوخ فرقلی ایدی.

باشقا بیر قارار آلیب فارسجا یازیلمیش اعلامیه‏لریمیزین قالیبی ایله تورکجه اعلامیه یازماغا چالیشدیم! بوردا ایشین نه قدر چتین اولدوغونو باشا دوشدوک!

بو حاقدا بیرسیرا دوستلاردان دا یاردیم ایسته‏دیم. آنجاق اونلارین دا یاردیمی یالنیز اعلامیه باشلیغیندا یازیلان شئعیر حددینه‏دک اولدو!

هرحالدا اوتوروب فارسجا اعلامیه قالیبینده تورکجه بیر ترحیم اعلامیه‎سی یازدیم. سونوندا چیخان ایش ایرادلی اولاراق مجبوراً چاپا وئردیک!

او گوندن بری دوستلارین توی کارت‏لاری، ترحیم اعلامیه‏لری، موختلیف موناسیبتلر اوچون یازدیقلاری بنئرلری و... فارسجا یازیلسا بیله اونلاری سوچلو دوشونمورم! گئرچکدن عمل‏ده بیراز چتین مسئله ایمیش!!

آشاغیدا اؤز یازدیغیم و اینتئرنئتدن تاپدیغیم تورکجه  ترحیم اعلامیه نمونه لرینی گؤره بیلرسینیز.

اینتئرنئتده توی – دویون کارت لارینا چوخ نمونه‏لر اولدوغو اوچون بوردا نمونه گتیرمیرم.

موختلیف موناسیبتلره (مکه، کربلا، تبریک، تسلیت و...) یازدیغیمیز بنئرلر ده چوخ دوشلاشیق بیر شئی دئییل. اونون اوچون خاص چتینلییی دوشونمورم. یالنیز قیساجیق آنادیلمیزده یازیب – اوخوماق حددینده ساواد ایسته‏ییر!

هامینیزا ان بؤیوک اوغورلار آرزوسو ایله.

گولشه نیم وار، ائلیم وار

بوکولمه ین بئلیم وار

دوشمن اؤزون یورماسین

اونودولماز دیلیم وار

اؤز یازدیغیمیز ترحیم اعلامیه سی:

بو سایتدان تاپدیغیم ترحیم اعلامیه لری:

http://canimurmia.mihanblog.com