بیر گوزل شعر

قوزولار روحومو اوتلار جاناوارسیزلیقدان

و چوبان قوردو بئجرمک‌ده داوارسیزلیقدان

هر یئتن سئوگیلیمین پئنجره‌سین بویلاندی

کؤنلومون شهری تالانماقدا دووارسیزلیقدان

بیر آغاج کؤرپونون اوستونده اوزانمیش دره‌یه

اؤزونو اؤلدوره‌جکمیش گئجه نارسیزلیقدان

بو آغاجسیز مئشه نی کارکاغیذ اعدام ائتدی

کندیرین گوزلری دولماقدا بو دارسیزلیقدان

اؤلو بیر سَس سکوتون تابوتو چیینینده گئدیر

چیچه‌یین یاس تؤره‌نینده، بو باهارسیزلیقدان

سرطان، شوک و اؤلوم، آه اوزانیب تخته وطن

هئچ سئروم داملامیر آخمیر بو دامارسیزلیقدان

کپنک‌لر داشینیر پنجره‌سیز گولدان‌دان

گئدیرم گؤزلریمی باسدیرام عارسیزلیقدان

ایلقار موذن‌زاده