اوشاغا کیم آد قویمالی دیر؟!

اوشاغا کیم آد قویمالی دیر؟!

-‌ سردار..

-‌ یوخ.. امیرمحمدعلی..

-‌ فرمان..فرمان قویون..

-‌ افشینننن..

-‌ یاشاررررر...

- ...

     اوستاد دفتری‌نین نوه‌سی‌نین آد قویما تؤره‌نی ایدی. ائل-طایفا ییغیشیب اوشاغا آد سئچمکده‌ ایدی. هره بیر آد اؤنه‌ ریب اؤزونو اوشاغا آد قویماقدا حاقلی سانیردی. کیمسه‌ ایسه کیمسه‌نین سؤزون دینله‌مک ایسته‌میردی. یازیق اوشاق نئچه ساعات ایدی های-کوی ایچینده  آدینی گؤزله‌ییردی..  ایش پیرتلاشاجاق ایدی. هر آغیزدان بیر هاوا چیخیردی. بوش دارتیشمالارا سون وئرمک گره‌ کیردی؛ آیاغا قالخدیم:

-‌ آغالار!..خانیملار!.. بیر دقیقه ایجازه وئرین..

چیغیر-باغیر گئت‌گئده کسیلدی...

-‌  آغالار!..خانیملار...ایسته‌ییرسینیز بیله‌سینیز کیم گره‌ک اوشاغا آد قویسون؟!

اوستاد دفتری یئرینده دیکلندی، قوناقلار:

-‌ یوووخ!...- دئدیلر.

بارماغیملا اوستاد دفترینی گؤسته‌ره‌رک- اوستاد دفتری‌نین گؤزلری‌نین ایچی گولدو - دئدیم:

-‌ اوستادین دووار بیر قونشوسو!!

اوستاد دفتری پرت اولدو:

-‌ سنینده میرتی نین باشی یاریم دیر هااا!..-‌دئدی.

هامی گولوشدو...

-‌ یوخ..یوخ... ظارافات ائله‌میرم  اوستاد، دوز دئییرم...

سونرا اوزومو قوناقلارا توتوب سوروشدوم:

-‌ بیز تورک دئییلیک‌ می؟

هامی سس سسه وئره‌ رک:

-‌  نییه تورکوک..

-‌ دیلیمیز تورک دئییل‌ می؟

-‌ نییه تورکدور...

راحات بیر نفس چکیب سؤزومون آردینی توتدم:

-‌  بیز تورک اولا-اولا..دیلیمیز تورک اولا-اولا.. دووار بیر قونشوموز فارسلار، او تایدا ایسه روسلار بیزه، دیلیمیزه آذری آد قویماییبلارمی؟!

کیمسه‌دن سس چخمادی آنجاق باش‌ ایله اونایلایانلار اولدو.

-‌  دوزون دئیین؛ بیز اؤزوموز هر یئرده قونشولاریمیزین قویدوغو آدلا تانیتدیرماییریق‌می؟!

-‌ ....

-‌ میللتیمیزه، قونشو میللتلر آد قویان یئرده، بللی‌دیر؛ اوشاغیمیزادا دووار بیر قونشوموز آد قویمالی دیر ... بئله‌ دئییل‌ می؟!...

یئنه کیمسه‌دن سس چخمادی. اوستاد دفتری دالغین-دالغین اوغلونو یانینا چاغیریب نمنه‌لر قولاغینا پیچیلدادی. اوغلان جلد ائشیگه چیخیب آز سونرا گئری دؤندو:

-‌ اوشاغین آدی سئچیلدی!...

قوناقلار بیرلیکده:

-‌ آدی نه اولدو؟!

-‌ عجم

     اوستاد دفتری‌نین دووار  قونشوسو بیر کورد اولمالی ایدی!...