یاغیش...

دونن آخشام چاغی سنسیز منی آغلاتدی یاغیش
یادیما سالدی سنی مطلبینه چاتدی یاغیش

کوچه لر اولدی گوزومده یئنه بیر آرپا چایی
منی سنسیز نئجه نیسگیل سئلینه آتدی یاغیش

اؤدو سوندورمه سویون قایداسیدی آمما دونن
کؤزه رن کؤنلومو یاغدیقجا اَلو لاتدی یاغیش

یادا سالدی اؤ یاغیشلیق گونو کی اوندا منی
کَپنَک تک باشینا شوقیله اویناتدی یاغیش

بو خاغیندان آخاراق بیلدی شیرینلیک شانیسان
گول اوزوندن سوزولوب بال فَرَه سین داتدی یاغیش

دوداقین قیرمیزی گوللر کیمی آچمیشدی سنین
سوزوله ن وقت اؤ دوداقلاردا قانا باتدی یاغیش

اؤ قدر مستیدیم هئچ بیلمه دیم آخیر نه زمان
سینه م اوسته ساریلان تئللری ایسلاتدی یاغیش

اینجه یاپراق تک اَسیب قوینوما گیردین اؤشودون
شَکَری گؤر نه مَهارتله دوزا قاتدی یاغیش

دامجی دامجی سنه لای لای دئدی قوینومدا منیم
نه دئییم بلکه سنی کؤرپه یه اؤخشاتدی یاغیش

صورا بیلدیم آپاریب قورد گئچینین شَنگولوسون
سنی مندن آلیب آنجاق منی آللاتدی یاغیش

دونن آخشام گئنه بیر سودا دا گوردوم کی منه
آجیلیقلا او شیرین خاطیره نی ساتدی یاغیش

اویانیردیم کی باشیم دَیدی ملامت داشینا
منی رؤیادان آیتماقدا اؤزی یاتدی یاغیش

شعر=مصطفی عزتی