تورکجه بیر شعر/نیه داندین؟

یاسلی یاپالاق فارسی دانیشماقدا نه گؤردون؟

ای بابکین اولادی نه چون اصلینـــــــــــی داندین؟

اویدون یارامازلار فئلینه اولدون اویونجـــــــــــــــاق

آنجاق نه بیلیم بلکی ده افشین دن اوتاندیـــــن!

هرزه سو کیمین اؤزگه لرین آرخینا آخدیــــــــــن

تورکون گؤزونه سن نیه یاد گؤزلوگو تاخدیـــــــن؟

شیمشک اولالی اؤز کوکونو آتشه یاخدیـــــــــن

یوز حئیف اولا کی تاریخی سن ترسینه قاندین

تورکون اولوسو،بیر قوجامان کؤکلی چیناردیــــــر

اولدوز کیمی پارلاق بو ائلین گئچمیشی واردیر

بیر داغ اولالی اؤزگه سی بیر صخره دیــواردی

داغدان چئویریب اؤز نیه دیواره دایاندیـــــــــــن؟

آچ تاریخی بو ائلده اولان شهرته بیر بــــــــــاخ

تومروس آنادان دالقالانان جرعته بیر بــــــــــاخ

قورقوت دده ستار اتالی میللته بیر بــــــــــــاخ

بیگانه لرین توهمتینه یوخسا ایناندیـــــــــــن؟

بیگانه بیزه مکر ایله توهمت داشی آتـــــدی

چوخ کیمسه چاشیب اؤزلوگونو اؤزگیه ساتدی

آلچاتدی اؤزون ،اؤزگه سینی عرشه اوجالتدی

سویله گؤزلیم سن نیه باخدیقجا اوساندیـن؟

تاریخلره گئتدیکجه بیزیم یول ـ ایزیمیــــــز وار

گویلرده هیلال بیر آییمیز ـ اولدوزومــــــوز وار

مئیداندا بوکولمز قولوموز سرت دیلیمیـــز وار

آیدین بو حقیقت لری گؤردون نیه داندیــــن؟

آیتام اورمولو