گوزل چورچکلر(افسانه)2

بنووشه

بنووشه گؤزل-گؤیچک بیر قیز ایدی. ماحالداکی جاوانلار اونون گؤزل‌لیگینه وورولموشدولار. قیش آدلی سویوق‌قانلی، باخشیندا شاختا، گولوشونده سازاق اوینایان بیر اوغلان اونا صاحیب اولماق اوچون دریدن چیخیردی. قیز ایسه هئچ کسه محل قویموردو، هئچ کیمه اؤز قلبینی وئرمیردی. او، باهار آدلی بیر گنجی سئویردی. باهار دا اونو. اونلار هر سحر گونشی بیرگه قارشیلاییردیلار. آیین باتماسینا بیرگه تماشا ائدیدیلر.

بنؤوشه بَی قیزی ایدی. باهار ایسه یوخسول بیر عائیله‌ده بؤیوموشدو. باهارلار بنؤوشه‌نین سئوگیسی سسه دوشدو. آدی گئجه‌نین قولاغینا، گونش شفق‌لره اونلارین محبّتیندن سؤز آچدی. جاوانلار تای-توشونا، یولبوللر گوللره، اونلارین محبّتیندن دانیشدی. بنؤوشه‌نین قادراشلاری بونو ائشیدیب اونلارین محبّتینه مانع اولوردولار. قیزی زورلا قیشا نشانلاییرلار و قیشین تاپشیریغی ایله باهاری بو ماحالدان دیدرگین سالیرلار. هر ایکی گنجین محبّتی پاییز گوللری کیمی سارالیب سولور. قارلی-بورانلی گونلر ایسه اونلارین گؤروشلرینه مانع اولور. او گوندن باهارین آیریلیغینا دؤزمه ین بنؤوشه‌نین بوینو بوکولور.

دئییرلر کی، هر ایل بنؤوشه اؤز سئوگیلیسی باهارین گؤروشونه هامیدان گیزلین گلیر. باهار ایسه اؤز گؤزلریندن لئیسان یاغیشی آخیداراق سئوگیلی‌سینی ایسلادیر. ظالیم قیش نه قدر اونلارین گؤروشونه قوروق-قاداق تؤره‌تسه ده، هئچ واخت بنؤوشه‌نی گؤره بیلمیر

قیزبویو چیچه‌یی

قیزبوی ساری رنگلی گؤزل بیر چیچک‌دیر. بو چیچک حاققیندا دئییرلر کی، گویا قیزبویونو اؤز عمی سی اوغلونا نشان لاییرلار. قیزبویو ایسه آتاسی‌نین چوبانینا کؤنول وئریر. آنجاق آتا-آناسی بونا هئچ راضی اولمورلار. چوبانین عشقی قیزبویونو دیوانه ائله‌ییر.

قیزبویو یاخشی دویور کی، اونون صاف محبّتینی هئچ کیم باشا دوشمه‌یه‌جک. او، چوخ فیکیرلشیر، چوخ گؤتور-قوی ائدیر، آمما چوبانلا قووشماغین یولونو تاپا بیلمیر. چاره‌سیز قالیب اؤزونو اؤلدورمک ایسته‌ییر. بیردن یادینا دوشور کی، چوبان دایم داغدا، داشدا، گوللرین، چیچکلرین قوینوندادیر. سئوگیلیسی الوان چیچکلر همیشه اوز به اوز دور.

قیزبویو باش گؤتورب ائودن-ظولمون النیدن قاچیر. گؤزل بیر چمن‌لیکده اوتوروب گؤیلره یالواریر کی، اونو بیر عطیرلی، الوان چیچک ائیله‌ییب چمن‌لیکده بیتیرسین، بلکه بو یوللا چوبانلا قوووشا.

گؤزل قیزبویو چیچک اولوب او واختدان چمن‌لیکده بیتر. عطریندن سئوگیلیسی اولدوغونو بیلن چوبان هر گون بو چیچه‌یین بویونو سئویب،‌ عطرینی قوخلایار.