"اوختای" ین شعری، "محمد رحمانی فر" ین آچیقلاماسی

"سن بو شعرلری بیر گوزگو کیمی سان! بیلیرسن گوزگونون اؤزونده هئچ بیر اوز یوخدور. آنجاق، هر کیمسه اونا باخسا، اوندا اؤز اوزونو گؤره بیلر. بونودا بیل شعرین اؤزونده هئچ بیر آنلام یوخدور. بونا باخمایاراق، هر کیمسه اوندا اؤز کئچمیشینی ها بئله اؤز گله جه یینی گؤره بیلر. دئسه ن شعرین آنلامی شاعیرین ایسته دییی آنلام دیر. باشقالاری ایسه اؤزلریندن اونا آنلام باغلاییرلار، ائله بیل بیریسی دئییر گوزگوده جانلانمیش اوز، ائله گوزگونون ایلکین اوزودور."

                                                                                         عین القضات میانجی(همدانی)[1]

-------

بو گونکو مطلبده "اوختای وطنخواه" ین بیر شعرینی اوخویوب و بو شعرین اوزرینده "محمد رحمانی فر" ین یوزومسال(هرمنوتیک) تنقید و آچیقلاماسینی دینله ییریک.[2]

 

بیر دیش تاخیلدی بو شعرین باشلانیشیندا

آنامین دیلینین اورتاسینا

بیر آلله سیز الی دیر،

گؤزومون آلتینی گؤوردن

یوموروق،شاپالاق

خیاوان اوزرینده خط لر

 ترافیک لامپالاریندا رنگ لره آلدانما

خط لر سون سوز

لامپالارا تک لیکده باخان اولمور

ائله بودور

گئجه لرینده قوخویور آیاق لاریم

کوچه نین باشیندا دووارا دایانمیش

اللری دیزی اوستونده

نوستالژی یاریشینا گئدیر.

 

اوشاق لیقدا بازاردا ایتدیگیم گون

ایکی گؤز آردیمجا سورونوردو

گولوردو منه

قورخودوردو بازاردان

اؤزلوگومو ایتیرمک شرطی ایله

امانت آلدی اوره گیمی

دیرناغی چکیلن قیزدیر

ماهنی لاریمین ریتمین قاتان

 

کاریخدی ایتدیگی گون

اؤزگه چادیراسینین اته گینه یاپیشدی

ساتیلدی اوشاق لیقدا

بو گون لر نئچه "اوختای" یاراندی قارانلیق کوچه لرده

بیریسی هامیدان آجیقلی اولار

بیریسی گونده نئچه سینه وورولار

بیریسی حامامدا ائولادینی سویا قوشار

سن بونلارا فیکیرلشمه دن

ساری ساچلارینی هؤر!

 

-------

[1] شهریارلا بیرلیکده اؤزگه لشمه دن اؤزلشمه یه دوغرو، محمد رحمانی فر، نشر ملینا، قم ،1392، بیرینجی صحیفه

[2] سینیق رادیو، 48 نجی یایین، siniqradio.com