سارای

سارا بیر آیدی بیزیم ائللره آیسیز گئجه لر 

بیر اوجا سسدی قولاق وئر اونا هایسیز گئجه لر

سارا بیر باغدی طبیعتدن آلیب قول بوداغی 

بیر شیرین ماهنیدی یانلیزاوخویار ائل دوداقی

سارا بیر قیزدی سودان سورمه چکیپ گوزلرینه 

جان دئییب بیرده اورکدن آرازین سؤزلرینه

سارا سئودا ایله دونیانی آنان بیر قیزدی 

او قارانلیق گئجه نی آیدین ائدن اولدوزدی

سارا سئودا ایله دونیانی آنان بیر قیزدی 

سارا غملر اوجاغیندا آلیشان بیر کؤزدی

بیر نجابتلی گلین دیر ائله آسلان سایاغی 

قویمادی قار ائده دنیاسینی چاققال آیاقی

اوزونی آتدی سئله اوزگنی حیران ائلدی

اویانان شمعینی پروانه‌یه قوربان ائله دی

قوشولوب سئللره گئتدی آنا یوردون ساراسی 

قالدی شیرین اورگینده یئنه فرهاد یاراسی

باغلادی ساچلارینی قویمادی بیگانه گؤره 

آنا یوردون قیزی وئرمز ساچین هر کیمسه هوره

گلین اولدی آرازا اوردا تویون توتدی سارا 

سؤیله‌دی اوردا اوره‌ک سؤزلرینی نازلی یارا

آراز آغلار گوز ایله آلدی سارای اللرینی 

دارادی ائل قیزینین بیرده قارا تللرینی

گئتدی گؤزلردن اوزاق دوشدی ائلین بیردنه سی

گورمدی خان چوبانین آیریلیغین سون نفسی

سارا گوز لردن اوزاق دوشسده ایتمز اثری 

بیر یاراق تک سؤزونون واردی هله چوخ کسری