تورکی

سئوگیلیم وئردی خبر گل قونوشاق بو گئجه نی

بو خبردن اوره گیم باشلادی چیرپیندی بیر آز

بیلمه دیم هئچ اوزومی تیتردی جسمیم هر آن

گوزلریم دولدی بیر آز آغلادی داشلاندی آراز...

*********************************

منی تب آز قالوری جسمیمه آتش ویرسون

بیلمه دیم یوللاری من هانسی شتابیله گئدم

یا اگر باغ تاپا بیلسم گولی الوان سرنیب

لاله بیر دسته دوتام یاریمه من تقدیم ائدم...

*********************************

تر دوتوب اوز گوزیمی آمما یئتیشدیم یاریما

اولمادی دیلده سوزوم بلکه بوغازیم قورودی

ایستییردیم اونا من نغمه قوشام هم اوخیام

طبعیمین چشمه سی خشک اولدی آوازیم قورودی...

*********************************

نئجه دون دوتدی باخیشلار هامی غملر قاچدی

بیر قارا گوز نگارین تخت وصالین تاپدیم

زولفونی یان ائله دیم قالدی قیزارمیش یاناقی

عشقیدن لعل لبیندن بیر اوپوش من یاپدیم....

************************************

بیلمه دیم بس نیه او گوزلری غمنن دولدی

منی آغوشه آلیب قویدی باشین قوللاریما

آغلادی قویمادی هئچ نوش ائلیم باده سینی

نه کئدر اولدی مگر وصلیده گویچک یاریما؟...

***********************************

دئدی چوخ شاد اولوری وصلیمه عادت ائله مه

بو وصال ایچره گولوم بلکه ده هجران داغی وار

یئتیشیبدی باغیمیز بارینه حیف اولسون اونا

گورمیسن هئچ پاییزین سینه ده سولموش باغی وار...؟

************************************

نه چتین اولدی منه سون گوروشی دلبریمین

گئتدی بیلمم هارا من سیز او گوزل جیرانیم

ایندی ای شوخ باخیشیم گور نئجه سن سیزلمیشم؟

گل دوباره سینه مه آی سنه قوربان جانیم...

**********************************

بو وصالین منی غمنن غمه آخر سالدی

ایندی من کیمنن ائدیم سن کیمی عشقین سراغین؟

سن سیز ای گول نه پریشاندی باخیشلار گونلر

گل بیر آز چک باشیما نازیله عشقین داراغین...

**************************************

ایندی من قالمیشام اوز دردیمه درمانیم یوخ

کاش بو سون لحظه لریم بیر ده دوباره گلسن

نه اولار روح بدنیمدن چیخاری گوزلریمه

عشقی معنا ائده سن آغلیاسان هم گولسن...

*****************************************

پاییزام آتش هجرونده یانیر بستانیم

حیف اولا گردش دوران سنی منن آلدی

بیلمه دیم هانسی دیاره سفره گئتدی گولوم

او سفر ائتمگینن قلبیمه نیسگیل سالدی....