شعر آنـــا تقدیم به همه ی مادران که رنج می کشن و محبت می آفرینند.

هر کیمین دردی اولا ، دردینه درمان آنادی

مُحنت و رنج و غمین ، دشتینه طرلان آنادی

سینه چون دشت بلا ، آتش بحراندا یانار

سارالان یاز گولی تک ، تشنه ی باران آنادی

هر بلا درده دوزر ، شرط محبتده اوزی

گر مصیبت داغ اولا ، صبریده طوفان آنادی

عشق پروانه سی تک ، شمع ائولاده گئنه

یاندیران بال و پرین ، عاشق گریان آنادی

آی دئسون اوخشاری وار ، اولدوزا چوخ بنزری وار

گونی خجلتده قویان ، دُرّ بدخشان آنادی

اوکی هر صبحه کیمی ، یاتمادی منن گئجه لر

منه لای لای اوخویان ، بلبل نالان آنادی

شاهلیقین شیوه سی وار ، مَسندی مین لشگری وار

تاج و تختسیز جاهانا ، سرور و سلطان آنادی

منی حیران ائلییه ن ، دنیادا بیر مسئله دی

نییه ائولاد اوتینا ، دنیاسی تالان آنادی

آناوین قدرینی بیل ، زاهد اگر شاه اولاسان

چون امیبسن سوتینی ، چشمه ی احسان آنادی