"کیم بیلیر بو شهرده نئچه "حنانه " لر وار؟!

اولو و قادیر تانرینین آدی ایله

گون اورتا چاغی آنامین داوالارین آلماق اوچون داواخانایا گیردیم اوردا اولان ایزدیهامی گؤرونجه نوبه یه قوشولمادان

اؤنجه بیراز دؤزمه گی صلاح بیلدیم چیخیش قاپیسینا دوغرو ساغ طرفده بالاجا قیز و آناسینین یانیندا بوش بیر صندل

اولدوغونو گؤردوم آستا آددیملارلا یاخینلاشاراق اوتوروب جمعیتین آزاجیق داغیلماسینی گؤزله دیم او آرادا یانیمدا

اوتوران قیزین گؤزل و معصوم اوزو منی اؤزونه منیمسه دی بالاجا قیزین اوزونه گولومسه یه رک دیک باخدیم آنجاق او

اوزونو آنی و سرت بیر حرکتله آشاغی دوغرو چکدی!بو ترپنیشی اونون اوتانقاچلیغیندان قایناقلادیغین دوشونه رک بو

دؤنه قیقاجی آناسینا باخدیم آیاق قیسمتینده چارشابینین ییرتیق اولان پارچاسی گؤزومه ساتاشدی اونا باخدیغیمی

باشا دوشمه سین دئیه تئلفونومو یاندیریب آیارلارین قوتدالاماغا باشلادیم او آندا قادین(ظننیمجه یوردداشیم دئییل

ایدی اؤزل بیر کند شیوه سی ایله دانیشیردی)منی موخاطب ائتدی :

_گؤزون قیزیمدا اولسون گلیم بااا

منده یارانان شوک ائتکیسی ایله کی گویا قادین اونا باخدیغیمی آنلایاراق منی سسله ییب,جاواب وئرمکدن عاجیز

قالیب سؤزونو تأیید ائتمک آنلامیندا باشیمی آشاغی یوخاری ائتدیم!شخصی مشغله لریمدن فیکریمین گؤی

قورشاغی کیمی قاریشیق اولدوغون او بالاجا قیزین گؤیچک و معصوم اوزونه باخینجا بیر آندا اونوتدوم تکرار گولومسه

یه رک بو دؤنه الیمی ساچلارینا چکدیم

_توکلرین چوخ گؤزلدی

یئنه چوخ چکینه رک باشین آشاغی سالدی!7,6یاشینداکی بیر قیزین بو قدر سسسیز اولماغی منه ماراق دوغوردو و

فیکریمدن مینلرجه فرضیه کئچیرده رک حیرتله بالاجا قیزا باخماغا دوام ائتدیم او آندا تئلفونومون سسلنمه سی منی

فیکری خیاللاریمدان ائشیگه چکیب حقیقی حیاتا تکرار ایتله دی;آناما داواخانادا نوبه یه دوردوغوم اوچون من چیخانا

قدر ماشینلا بیر اطرافدا گزینمه سینی اؤنردیم!تیلفونومو باغلاماق همن اینجه و تیتره ک بیر سس قولاغیما توخوندو

_خاله

بیر یاندان بالاجا قیزین منیمله دانیشماغا چالیشماسی سئویندیررکن بیر یاندان اولدوغوم جولرده چوخراق یاش

باخیمیندان هرکسدن آشاغی اولدوغوم اوچون(خاله,آبجی,..)کیمی سؤزجوکلره تامارزی قالمیش کیمی بو دؤنه داها

درین بیر گولومسه مه ایله جاوابلادیم :

_جانیم؟!

آنجاق او گینه باشین آشاغی سالاراق منی حیرتده بوراخدی او آن ذهنیمده بیر ایشیق یانیب سوندو و اؤزومله

دوشوندوم;قیزجاغیز بلکه ده تورکو بیلمیر!الیمی آستاجا چنه سینین آلتینا آپاریب آغیر بیر حرکتله یوخاری چکدیم

_میشه اسمتو بپرسم؟!

بالاجا قیز بو دؤنه اوزونون بوتون پارچاسین منه دوغرو چئویردی او آندا اوزونون منه گؤرونمه ین یاریسینین گؤورتیلرله

دولو اولدوغون گؤردوم یئریمده ترپنه رک داها دیققتله باخدیغیمدا بالاجا قیزین نارین و سویو چکیلمیش اللرینده یانیق

ایزی اولدوغون باشا دوشدوم نه ائده جاغیمی بیلمیردیم تک دوشونجه م او یاشدا کی بیر اوشاغین ندن او شراییطه

دوشمه سی ایدی!! الیمده اولمادان او معصوم اوزون منه باغیشلادیغی گولومسه مه ایله ویداعلاشیب قاشلاریمی

چاتاراق کیفیمدن کیچیک بیر کاکو چیخاردیب آنجاق اونا قارشی ساخته بیر گولومسه مه ایله دئدیم :

_می خوری؟!

قیز باشین یوخاری توتمادان سادجه اونا دوغرو بیر زاد توتدوغومو آنلایاراق ضعیف بیر سسله جاوابلادی :

_یئمیرم

او آندا فیکریم تکرار قاریشدی!دئمک بالاجا قیز تورکجه بیلیردی بلکه ده آناسی اونونلا فارسجا دانیشدیغی اوچون او دا

شهرده اولان مینلرجه اوشاق کیمی هانچی دیلده دانیشاجاغیندا قالمیشدی!بیر یاندان داواخانادا نوبه یاریلانمیشدی

و منیم قالخیب داوالاری آلماغیم گرکلی ایدی آنجاق بیر یاندان دا گؤردوغوم گؤرونتویه تئپکی سیز قالماق الیمدن

گلمیردی!تام او آندا قادین الینده چئشیدلی حب لرله دولو بیر نایلونلا یاخینلاشیب قیزینین الین سرت بیر حرکتله

توتوب صندلدن یوخاری دوغرو چکدی و سونرا چارشابین باشیندا ساغا سولا چکه رک دئدی :

_سنه ده زحمت وئردیم

قادینین دانیشیق اوسلوبو فیکریمی مشغول ائدن مینلرجه سورغو و دوشونجه آراسیندا ایتمیشدی یعنی او ان سؤن

دوشونجه گیم مسئله ایدی!فوضوللوق کیمی گؤرونسه ده اؤزومو ال اوزوو گووریب منزوی بیر کاراکتره بورونن  7,6

یاشینداکی او قیزین آناسی ایله بحث باشی  آچماغا حاضیرلاییردیم کی قادین قیزین کؤهنه و رنگی سولموش اته

گینه باخیب یوکسک بیر سسله سسله دی :

_حنانه دئمه میشم میراسیوی باتیرما

سونرا ایکی الین یوخاری دوغرو گؤتوروب سرتجه بالاجا قیزین باشینا ووردو!بیر ایکی ثانیه دینمه دیم یعنی دینه بیلمه

دیم!قادین تکرار آنی حرکتلرله قیزین وورماغا باشلادی اطرافدا بیر چوخ انسانین بو حادثه یه یاخیندان شاهید

اولماقلارینا رغمن هئچ کس بیر تئپکی وئرمه دی!بیر آندا اؤزومه گلیب الیمی قادینین الینه دوغرو آپاریب چوخ

زورلانسام دا یوموشاق بیر سسله دئدیم :

_خانیم وورمایین,اوشاقدی!

قادین حیرصدن قیزاران اوزون منه دوغرو توتدو

_اؤلونو اؤز خوشونا قویسان ....تابوتو باتیرار

اوتقوناراق بو دؤنه داها آغیر بیر سس تونو ایله بیله سینه دئدیم :

_بیر لحظه دؤزون ...

قادین سؤزومو بیتیرمه گیمه اجازه وئرمه دن بالاجا قیزی داواخانانین چیخیشینا دوغرو ایتلیه ایتلیه ایره لی گئتدی....!!

منی حیرته قویان قیزین هئچ بیر تئپکی گؤسترمه دن ساده جه سس سیزجه آغلاماغی ایدی,من هله ده وار حتی

ایکی بالغ انسانیندا بیرلیکده بئله ساواشا  بیله جکلرینه اینانا بولمورم هله قالسین اگر کی بو شخص لردن بیری آنا

اوبیریسی ده بالا ایسه!!بالاجا قیزین معصوم و مظلوم اوزو بئینیمه بیر چرچیوه سالیب سانکی!کیم بیلیر بو شهرده

نئچه حنانه لر وار؟!مادی و معنوی عائیله وی سیخینتیلار آجیماسیز بیر آنا  اولماغا یتئرلی بیر سسب می؟!اوشاغینا

سئوگیسینی اسیرگه ییب اونو دؤوه رک بسله ین بیر آنا و یا آتا توپلوما نئجه بیر شخص سوندوقلاریندان خبرسیزلر!!

بیلیم یوردوندا چاشمیش انسانلار باخیشیندا دیزلری تیتره ین,اوزوندن 15 ایل بؤیوک بیریله آداخلانان قیز "حنانه""دی!

یانلیش یوللارا جایان,اعصاب و پیسخولوژیسی پوزوق اورتاق یاشاییشیندا اوغورلو اولمایان قیز گینه "حنانه"دی!! و بو

اؤلکه ده نفس آلیب وئرن مین بیر "حنانه"!! بعضی آنا و آتالارین اوشاقلارین حتی بالاجا ضربه لرله تنبیه اولاجاقلارین

دوشونوب اونلاری تربیت آماجی ایله وورورلار او ضربه لرین جیسمی باخیمدان بیر ضرری اولماسادا اوشاغین

پیسخولوژیسینده درین و قالارلی ائتکی لر بوراخیرلار او جومله دن:"هر پرابلم بیلک گوجو ایله چؤزولر"دوشونجه سین

یاشاییشلارین آنا تملینه یئرلشدیرمک کیمی! چئشیدلی شیدت و زوربالیق لارین اورتاق ندنلری بیلیم آداملارین

قلمیندن بئله سوزولور; بیر شخصین باشقا بیر شخصه شیدت اویغولاماسی اؤزونو یوخاری بیلیب طرفی هر باخیمدان

آشاغی گؤرمه سی دیر عئینی زاماندا اونا سئوگی , حورمت و ساییر دیرلری تحمیل ائتمک آرزوسیندان قایناقلانیر!

دئملی شراییط نه اولورسا اولسون بیر انسانین اؤزللیکله اوشاغین جیسمی و روحی شدته اوغراماسی دوغرو

دئییل! هئچ بیر دوغرونو بیر یانلیشلا اؤیرتمک اولماز; بونو یاشاییشیمیزین هر پارچاسینا آسمالییق! اوشاغی سئوگی

و مرحمت ایله بسله مک اونا هر بیز زاد دان اؤنجه  اؤز گوون  قاتار کی بو عاغلی باشیندا حاقین ساوونا بیلن بیر

انسانین ان اؤنملی وارلیغی دیر!! گلجه گیمیزی تکجه حوریت هوجله ین , هر بیر باخیمدان کمالا چاتمیش اوشاقلار

بسله ییب بئجریب اونلارا تاپشیراراق آیدینلاشدیرا بیلریک!

بونو تورپاغیمیزا و انسانچیلیغا بیر بورج بیلیب اؤدمه یه چالیشمالییق!

و نهایت نه گؤزل دئییب شاعیر :

"هئچ بیر ایدئولوژی بیر اوشاغین آغلاماغیندان داها دیرلی دئییل!!"

 

آیتک_آزربایجان