درباره من

قاتار مییانا دایاناغیندان گون باتانا ساری یاواش یاواش یولا دوشجه یین سن پنجره دالیسینا گلدین. او گؤز قنشَرینده کی توپ ایشیغا باخدین. شهرین چیراغلاری بنه ک بنه ک چیریلدیییردی. ایراقلانیردی، جینقیرتیسی دا چیخمیردی. یئنه ده قاتارا، قاتارکی لارا مغرور مغرور باخیردی. یئنه ده شهرلیک قیددینی کنده وئرمیردی(1) اؤز ایچینده قیوریلیردی. سایمازدان سوسوردو.

قاتار یئیینله دی، یؤگره ک لندی. چاپاچاپ گئتدی. مییانانین چیریلتی لاری(2) داغلار دالیندا دالدالاندی.
شهرین غورورلو باخیشی قارانلیقدا ایتدی!

ساآت اؤنا یاخینلاشیردی. گئتدیکجه قاتارین ایچی های کؤیدن آرینیردی. سایخاشلانیردی. داغ لار-آرا، گئتدیکجه، گئجه نین درین لییی بیر قویو تکین درینله نیردی، پنجره آرخاسیندان قارانلیق لارا گؤز تیکن لرین عالمیندن نه لر کئچیردی. اؤخ باتمیان قارانلیقدا، داغ لار پیریلدیییردی. داغ دره نین بور-بوجاغی، بوی بوخونو، اوزاق خاطیره لردن باش قووزویوردو. ائله بیل گؤزه چارپیردی. (( تاتاتاخ، تاتاتاخ، تاتاتاخ ...)) قاتار ییرغانیردی. هر بیر "تاتاتاخ" سسی نن، ائله بیل، بیر قارانلیق قاپی آچیلیردی، سونرا او بیریسی. سونرا اوبیری سی ... ، دال-با-دال، دابان قیرما.

--------------

1 - شهرلی لیی کندلی لیکدن اوستون توتوردو

2 -ضعیف ایشیق
-----------------

"قارا چوخا" کیتابیین باشلانیش بندی - ناصر منظوری


اَن چوخ سئودییم کیتابلاردان بیری!

 

درج شده در تاریخ ۹۴/۰۴/۱۲ ساعت 23:05

کاربران آنلاین (0)