باهار گلدی ائل اوبامیز سئویندی داغلارا سس سالیب کؤچَن واختیدی

«   واختیدی   »

باهار   گلدی   ائل  اوبامیز  سئویندی

داغلارا سس سالیب کؤچَن واختیدی

طبیعت   گئینوب   یاشیل    کؤینَگین

ســـَرین سولاریندان ایچَن   واختیدی

وعده سیله  داغلار  قاری  اریدی

سُولار  آخدی هَــر طرفی بؤرودی

چوبان سؤرو دالیسیجا ن یئریدی

یولدان یولاقلاردان کئچَن واختیدی

بولبوللر  اوخودو   گل  هَوسیندن

یاتانلار اویاندی  نغمه  سَسیندن

آچان لاله سیندن بَنوشَه سیندن

بوداقدان بوداقا  اوچان   واختیدی

«شیرزاده »دولانیر ائل سُراغیندا

یوردوموزون   آرانیندا  ،  داغیندا

گؤزل طبیعتین گلشَن  چاغیندا

قوجاغین ائللـره  آچان  واختیدی