گتدگین یولا نیسگیل باخمیشام

گئتدگین یولا نیسگیل باخمیشام

آددیملامیشام هر قدم باشی

هر سحر چاغی هر گون اورتاسی

آلدیم قوینوما ووردوغون داشی

چوخ چتین گلیر آیریلیق منه

قال قارا گیله گؤزلرین گؤروم

باسیم باغیرما نازلی دلبریم

گئتمه ساچلارین یئنیدن هؤروم

خسته قالمیشام سن گئدن بری

گؤز یاشیم آخیب غملی اوزومه

باخدی حالیما دوشدو کاغیذا

آی اوچان پری بیر باخ سؤزومه

وئردگین سؤزو سن اونوتموسان 

پاییز آخشامی گون باتان چاغی

اَلیم اَلیندن هیچ اؤزولمدی

اما سن ووردون بیر یامان داغی

قال قادان آلیم گئتمه سئوگیلیم

آیریلیق سالما آی گؤزل پری

گوزلریم سنی هیچ اونوتماییر

گل کُمکلیغا آی اولو تاری

عیبی یوخ اما من دؤزوملییم

باخیب یوللارا سنی گوزلرم

هر قدم آتیب «شاهیدین» سنین

نیسگیل-نیسگیل ده سنی اُوزلرم