کونول

کونول! سن وئر منه باده، دوشوم یاده، آتوم دردین یوکون ساده، چکوم باشدان بو سجاده، سالوم بو شهره آوازه، گئدوم کوی پریزاده، ویروم نعره مثال شیرک ماده، دیوم یاره، دل آزاره، کی مندن اولماسون بیر ذره آزرده، منی ترک ائتمسون بیر آن، منه چوخ ویرماسون یاره، بئله ساده.

اولوم من مست مستانه، گئدوم من کوی دلداره، باخوم ماه پریشانه، آخور گؤزدن گولوم اشکیم منیم بیردانه بیردانه، دئییم سن سن منیم دلبر عزیزیم ماه دردانه، دئییم سن سن حبیبیم، قلبیم ای گوزلری مرجانه، دل افکارم، پریشانم، نئچه گوندور کی حیرانم، گل ایله دردییمه چاره، منم بیچاره بیچاره.

صبا! سن گئت دئنن یاره، دئنن ای گوزلری قاره، ائولور بدبخت بیچاره، گل ایله دردینه چاره، دوباره اول اونا سن ماه و مه پاره، چئکنمور دای نفس، قلبه ویرور هربیر نفس یاره، نئجه یاره.

صبا! سن گئت دئنن یاره، اولوب قلبیمده صد پاره، خدایا ایله بیر چاره، بلا گورستمه اول یاره، نگاره یاخشی دلداره، بلا گورستمه اول یاره.