اؤیکو........اومود قاپیسی

اری نین قیزارمیش پئنجک شالوارینی اوتوله ییردی اوتاقدا

اوجاق اوسته یانمیش دولمالارین اؤلوم خبری یاییلدی هاوادا

لئی کیمی آشپازخانایا سیخدی

آنجاق دولمالار داها دونیالارینی دگیشمیشدیلر

ایکی اللی باشینا ووردو لالا خانیم

و فهله ایسماییلین شامسیزلیغینا

اؤنجه دن شیدیرغی یاغدی

همن آن اوجادان سالام سؤیله دی

اوتونون پئنجکله قوجاقلاشماسی

اوتاغا قاییتدی قیرباق یئریشلی

 دولاندی بیر آندا باشینا دونیا

تلسکن قاچاندا دولما یاسینا

دونون اوجو آشیریبمیش اوتونو

ایلدیریم تک شاخیدیردی اوره گین

ایسماییل نه یئسین شاما، جهننم

یارین قارشیدا کی تویا نه گئیسین

سن آرواد یوخ

 یامان گونده یولداش اوخو سان لالا

دانلاییردی اؤز اؤزونو قهردن

قاپی تاققیلتی سی دانیشدی اونلا

گؤزلرینی سیلیب آچدی قاپینی

سالام لار ایسماییل یورولمایاسان

سلام لار مارالیم، نئجه سن لالا؟

دوننکی سسینی ائشیتدی تانری

کونتارات یاغلی ایش توش گلدی لالا

ایشدن چیخیب دؤندوم تاناکورایا

اؤزومه بوز بویاق پئنجکله شالوار

سون درجه یاراشیقلی قیرمیز دون

گؤزل لر گؤزه لی لالاما آلدیم

بو کره گؤز یاشی سئوینجدن آخدی

کاسیبلیق جنگینه عسکر لالانین

پالتارا باخاندا گؤرسون نئجه دی

بیر داها سسلندی اومود قاپیسی

آی خالا سئوینجم، آچین قاپینی

سئوینجی گؤرمه دی قاپی آچاندا

اونون الینده کی شام پایین گؤردو

سئوینجی سئوینجدن باسدی باغرینا

پایین آلیب یولا سالدی بالانی

پایی قویدو یئره دهلیزده لالا

ال لرین قالدیردی شوکور سؤیله سین

آغلایا آغلایا قادیر سن دئدی

کرمینه قوربان مئهریبان آللاه

 

یازار:ائلمان موغانلی