یارآغلادی من آغلادیم

یارآغلادی من آغلادیم

  یارین بویون  قوجاغلادیم  یار آغلادی من آغلادیم  

ییغیشتی قومشولار بوتون  جار آغلادی  من آغلادیم

طاریمدا نار  آغاجلاری منی   گوروپ   دانیشدیلار

بویومو  زیتون  اوخشادی  نار  آغلادی من آغلادیم

سوزلریمی دئدیم  تارا، سیملر اولدی  پارا پارا

یاواش  یاواش سیزیلادی  تار  آغلادی  من  آغلادیم

باشیندا قارلی داغلارا دانیشدیم آیریلیق  سوزون

بیر آه چکیب  باشینداکی  قار  آغلادی من آغلادیم

دئدیم کی حاق منیم کیدی  باشیمی  چکدیلر  دارا

طناب  کسنده  بوینومو  دار  آغلادی  من  آغلادیم

جعفری یم   بویوم  بالا   یار   جانیمی   آلا آلا

غم  سینه مده   قالا  قالا   یار آغلادی من آغلادیم

هوشنگ جعفری زنگانلی