غم سیز بشر اولماز

فیکر ائتمه گوزه ل دونیادا غم سیز بشر اولسون

یا هر گله نه دونیا غمی  بــی اثـــر اولسون

اونلار کی یئرین توپراقینی گوهر ائده للر

مومکوندور اولاردان بیزه ده بیر نظر اولسون

عومر اولسا حسابسیز گئچه جاقدیر قالا بیلمز

دوز گئت یولووی قوی سنه یاخشی سفر اولسون

سلطانــلارا ، اصلانــلارا  فیکر  ائیله  گئدیبلر

چون گئتمه لی سن قوی قالانون خوش اثر اولسون

قان   ائتمه  یازیقلار  اوره گین  جام  اجل  وار

بیرگون ایچه جاقسان اونو قویما زهر اولسون

املیک قوزولار اوت یییه بیلمز داغا سورمه

امسین نه نه سین قییما کی عومرو هدر اولسون

گر یاندیــراسان اودلار ایچینــده ضعفانـــی

آرزیم بودو کاخلار سنه زیر و زبر اولســــون

ای«محسنی»حق سوزلری یازماقدا یورولما

فیکر ائتمه گنیش دونیادا غمسیز بشر اولسون