گیزلی بیر سؤز / یانار اردبیلی

سنه گیزلی بیر سؤزوم وار

اوره‌ییمده گیزلتمیشم؛

نه واختانسا

          گیزلتمکدیر ایشیم، پئشم.

هارا گئتسن

آرخان بویو هئی سورونور گؤزوم منیم؛

یامان سؤزدور

اوره‌ییمده گیزلتدیییم سؤزوم منیم.

کؤنول دئییر : گل سیرری آچ!

آنجاق نئیلیم

اوره‌ک اوزلو، دیل اوتانقاچ.

بیلیرسنمی؟

سنه گیزلی بیر سؤزوم وار

                   بیلمیر هئچ کس.

من دئمه‌میش

          اونو دویسان،

                   اونو بیلسن

منیمکی‌سن،

منیمکی‌سن!

یانار اردبیلی