سحرین عطرین

یئنه غمخانه كیمین دیر مَنه دونیا گئجه لر

سَن كی یوخسان گؤره سَن گؤزلری دریا گئجه لر

بیر قارانلیق كوچه دیر ، بیر باجادیر ، بیرده منم

كیم بیله ر دردیمیزی هَمَشه، یلدا گئجه لر

گؤزلیم گؤزلرینی اولدوز ائله گؤزلریمه

بلكه اولسون یوخومون كابوسی ، رؤیا گئجه لر

سن گئدَندَن سورا بیر بُغضدی سالیب درده منی

گوزیاشیمدان ائله دیم دردی مُداوا گئجه لر

اوره ك اولدی پارالی ، گؤزلریم اولدی یارالی

یارادا هریارایا ائتدی مدارا گئجه لر

سئوگی نین معناسینی گئزمه اوره کلرده کی من

ائتمیشم صبحه قدر سئوگینی معنا گئجه لر