بیر گون یولوم دوشدی مزاریستانا

بیر گون یولوم دوشدی مزاریستانا

ائله حئیس ایله دیم دووران یاتیبدی

گؤردوم اینسانلاری سسیز صداسیز

بیلدیم دن قورتاریب درمان یاتیبدی

سؤیکه دیم بیر داشا ناتاوان دیزی

زییارت ایله دیم آخر ائومیزی

گؤردوم دار قبیرده ظالیم چنگیزی

ایلییب دونیانی ویران یاتیبدی

ایسته دیم قاییدام ایاق دایاندی

باخدیم بیر قبیره اؤره گیم یاندی

دونیانی ترک ائدیب بیر آز زماندی

یار وصلین گؤرمه میش جاوان یاتیبدی

حیرصیدن دیشلریم بیر بیرین یئدی

گؤزوم گاه آغلادی گاه گولومسه دی

داشین اؤستونده کی یازیلار دئدی

شاعیر آستا یئری اینسان یاتیبدی

آلقانا بویادی دیشیم دوداقی

هر نه دن چتیندی اوولاد فراقی

گؤردوم بیر قبیرده خیردا اوشاقی

آناسیننان اوزاق گیریان یاتیبدی

اویما بو دونیانین پیس مرامینا

دونیا سؤلیمانلار چکمیش کامینا

یولچی تعنه وورور شاه مقامینا

آقادان یوخاری چوبان یاتیبدی

اوردا هیتلر دوروب جنایت ائتمز

یولداش یولداشیا خیانت ائتمز

یوخسوللوخ بیر کسی خجالت ائتمز

توپراق ایچینده هامی یکسان یاتیبدی

توپراقلار آلتیندا اریییب بدن

گلدیگیم ندندی گئتدیگیم ندن

بیریسی تاپماییپ اوچ قاریچ کفن

قرانلیق مکاندا عؤریان یاتیبدی

اوردا نه جللاد وار نه دار آغاجی

قارداشین تانیمئیر اوردا خان باجی

دؤنؤب یار یارینا باخمیر قیقاجی

اداسیز عشوه سیز جئیران یاتیبدی

اوردا درک ائتمدیم پاییزی یازی

بیر یئرده یاتیبدی اوغرینان قاضی

توپراق آلتیندا گؤردوم من "آیریلمازی"

گلیب گتمگینه حئیران یاتیبدی.

بو شعری یازان: شاعیر" آیریلماز"