سئویرم سنی

وفالی گؤزلیم سئویرم سنی،

گئل منی اینجیتمه ناز باخیشینلا.

آلیشیب یانیرام عشقینله هرگون،

گؤرمه‌سم اؤلرم آز باخیشینلا.

حیات یوللارینین، وار دومان چنی،

عؤمرومه یار سئچیب سئومیشم سنی،

سئوینج گؤزل اولار سن سئوسن منی،

آدینی قلبیمه یاز باخیشینلا.

گؤزللر گؤزلی نازلی گؤیچکیم،

بیر آللاه قلبیمده بیر سن ملکیم،

سئوگی دنیاسیندا، گولوم چیچکیم،

آچیلار اؤره‌ییم یاز باخیشینلا.

دوداغین غنچه‌لی، باخیشین درین،

گؤزومون ایشیقی کؤنلومده یئرین،

عؤمرومون چیچگی واردی خبرین،

"باخیش" گلیر جانا، ساز باخیشینلا.

ریضا"باخیش" 02/06/96