عؤمور

عؤمور کئچیر کاروان یولون،
دونیا کیمه قالاجاقدیر.
اؤلوم اوچون یاشاماغا،
بوشالدیقجا، دولاجاقدیر.

شادلیق، سئوینج، ساز عؤمرونه،
چیچک بیتر یاز عؤمرونه،
عجل، اینسان آز عؤمرونه،
چاره‌سیز بیر اولاجاقدیر.

کیمی غمله عؤمور بویو،
گؤزلرینین آخیر سویو،
قارانلیق بیر درین قویو،
یوسیف کیمی سالاجاقدیر.

یاخچی، یامان، قوهوم، یادا،
اینسان کؤپوک، یئل هاوادا،
آت اویناتما بو دونیادا،
نفس وئریب، آلاجاقدیر.

یاخشی یارات، یاراداندا،
آغ اؤرپه‌یی، قاراداندا،
ده‌مسینلر، سوراداندا،
رنگی قاچیب سولاجاقدیر.

"باخیش" چکیر غم یوکونی،
ایگید ساخلار، دیل کؤکونی،
هرکس بیچر، اؤز اکینی،
بیچیلمه‌سه، یولاجاقدیر.

"ریضا باخیش" 1397/03/10