قوجاتدین منی

فیکیر دونیاسیندا، عؤمور باغیندا،
یامان فلک نه تئز قوجاتدین منی،
سئوینجی، شادلیقی، کوسدوردون مندن،
ازل غمه، یولداش، یاراتدین منی.

طالعیم قارالی، بختیم قارالی،
اوره ییم کدرلی، سینم یارالی،
مندن اوزاق دوشوب، گزدین آرالی،
گؤزومه باخارکن، آغلاتدین منی.

سیندیردین قلبیمی، هئچ بیلمه دین سن،
منله اینات دوردون، یول گلمه دین سن،
آخان گؤز یاشیمی، باخ سیلمه دین سن،
یاتیلمیش بختیمنن، اویاتدین منی.

کؤوره لیب اوره ییم، یانان واختی دیر،
دیللنیر یاراسی، سینان واختی دیر،
هانی خوش گونلریم، یامان واختی دیر،
گؤر نئجه سیخیلیب، داراتدین منی،

فلک یازدیغینی یازار داشیما،
اویونلار قالمادی، گلدی باشیما،
قوجاتدی باخمادی، جاوان یاشیما،
یاشاماق عشقیله آللاتدین منی.

یارالار ساغلادیم، قلبیم گولمه دی،
گؤزومون یاشینی دوسلار سیلمه دی،
درد منی اؤلدوردو، "باخیش" اؤلمه دی،
داغ چکیب قلبیمه یاشاتدین منی.

ریضا "باخیش" 1397/03/15