بوراخ اللریمی ...

سن مترو دلی سی من داغ دلی سی

سن دمیر دلی سی من باغ دلی سی

من یاغیش دلی سی ایسلاغ دلی سی

بوراخ اللریمی قوی چیخیم گئدیم

--------------------------------

ایتن وارلیغیمی هاردان آلیم من

هانسی قارچیچه گین قاردان آلیم من

گئدیرم یازیمی یاردان آلیم من

بوراخ اللریمی قوی چیخیم گئدیم

-----------------------------------

منی قارپاپاغلی قایالار تانیر

بوغریب شه هه رده دردیم ایسلانیر

گئجه دن اوره گیم اود توتوب یانیر

بوراخ اللریمی قوی چیخیم گئدیم

----------------------------------

غوربتدن غوربته داغیلیر آدیم

بوغولور ایچیمده اولو فریادیم

ایستیرم آنامین لای لاسین دادیم

بوراخ اللریمی قوی چیخیم گئدیم

-----------------------------------

ارییر ایچیمده قیشین بوزلاری

آلقیشا قووزانیر گؤی اولدوزلاری

یولومو گؤزله ییر وطن قیزلاری

بوراخ اللریمی قوی چیخیم گئدیم

-----------------------------------

دایانا بیلمیرم باغیشلا نازیم

دیلیندن آسیلیب صدفلی سازیم

بئله بیر گئجه ده یازیلمیش یازیم

بوراخ اللریمی قوی چیخیم گئدیم