قاییت

قاییت دورنالارین یاز نفسینده

دویونلو آخشامین پنجره سینده

شعریمه چیپ جالان سویون سسینده

قاییت قوللاریمی اؤزومه قایتار

***

سنی تاپشیرارام بولودلار یاغا

پاییز دوداغیندا یاغاسان باغا

آز قالیر حسرتین چئوریلسین داغا

قاییت قوللاریمی اؤزومه قایتار

***

دردی زینه - زینه سوزوب آغلادیم

بیر دوداق یاراسی دؤزوب آغلادیم

سنی هر زاماندا گزیب آغلادیم

قاییت قوللاریمی اؤزومه قایتار

***

بیلمم نه سئحیردی بیلمم نه ایشدی

قارا ساچلاریندان الیم سوروشدو

قوللاریم قیریلیب بوینونا دوشدو

قاییت قوللاریمی اؤزومه قایتار

***

بیر آلما پای گتیر بیر آلمالی یاز

قوشولاق یئللره اوچاق بم بیاض

خزره بند اولوب بیر صدفلی ساز

قاییت قوللاریمی اؤزومه قایتار

***

چیخ دمیر یولونا قاش قارالاندا

قاطار گؤرپولری فیکره دالاندا

اوگون او آخشامی یادا سالاندا

قاییت قوللاریمی اؤزومه قایتار