سیندیم بو گئجه

سیندیم بو گئجه پنجره نین لال باخیشیندا

بیر لحظه دایان گئتمه آیاق سال باخیشیندا

قاردان قورتولان ماهنیلارین رنگی قارالمیش

آل قوینونا بو قارلی سازی چال باخیشیندا

گول خونچادی عشقین یاراسین باغرینا باسمیش

ایللردی سینیر چرچووه نین کال باخیشیندا

یول باغلی کوچه گؤزلری یاش گونده لیگینده

بیر پارچا اوچوش واردی داریسقال باخیشیندا

هردن آچیلیر گؤیلری ظلمت گئجه لردن

هر دن گول آچیر آلما گولو آل باخیشیندا

خالسیز سئویرم گؤزلرینه سئوگی جالانسین

بیر دامجی اوره ک چیب جالانیر بال باخیشیندا

گؤزلردن ایراق قوللاریمی بوینونا سالدیم

سیندیم بو گئجه پنجره نین لال باخیشیندا