سئودیم

سئودیم آلاوولاندیم سئومه دیم یاندیم

سئوگی بیر گوناه دیر ایچیمده منیم

اؤزومو ایتیردیم اؤزومو داندیم

سئوگی درین آه دیر ایچیمده منیم

دئمه «آیریلیق »دیر چؤکوب تئلینه

دئمه ناغیل لاردا سؤزون قالاجاق

قووزانیب اوچساندا گونش ائلینه

«دومان» لی یوللاردا گؤزون قالاجاق

من سنی سئویرم بو اوره ک بو قان

سئوگی سیز هه له ده گولمه یه جک سن

اؤزونده  خزره چئوریلن زامان

سن منی اونودا بیلمه یه جک سن

یالین فاصیله لر آییردی بیزی

نه سنده گوج قالدی نه منده داها

بیزه ایلهام اولدو بیر آلما ایزی

بیاض بیر گئجه ده باتدیق گوناها

گئتمه گ ایسته ییرسن او یول - اودا سن

آمما سئوگی میزه ده یمه سین الین

باخ اوجا داغلاری بورویوبدور چن

اؤزوندن یه لیگ اول آی ساری گه لین