عزیز سلامی دن بیر نئچه شعر

تورپاق رنگینده

بیر گون ائشیده جک سیز خبریمی

"عزیز اؤلدو " دئه یه جکلر

آغلایانیزدا اولاجاق

حسرتله دوشونه نیزده

هئچ نه اولماییب میش کیمی

ائشیده نیزده ،

سونرا نوبه چاتاجاق سیزه

اسه جک کولک

بیرم – بیرم

توکه جک سیز تورپاغا ،

هله واخت وار

گلین ائشیده ک بیر بیریمیزی

گلین گوره ک رنگلریمیزی

هر رنگده اولورساقدا سولاجاغیق

بیر گون هامیمیز

تورپاق رنگینده اولاجاغیق !

درین بیر قویو اول

دردینی نادانا دئمه ای کونول !

آغلاماق یئرینه

گوله ر سؤزونه ،

درین بیر قویو اول سن نادان اوچون

قوی ایچین گورونسون آنجاق اؤزونه !