بیرعطیر

بیر عَطیر ، بیرجه باخیش ، یاز هوسیم وار نئیلیم

ننه نرگیز کیمی بیر آز هوسیم وار نئیلیم

باخمیرام کی داها تویدا آشیق اویناتمیرلار

هله ده سؤز هوسیم ، ساز هوسیم وار نئیلیم

گؤلَه دؤنسم ، بیر ایکی جیرانا حسرت چکیرم

گؤله دؤنسم ،بیر ایکی قاز هوسیم وار نئیلیم

آلما آتماق هوسیم یوخ ....."هَه" دئمه سئودیجه ییم

"یوخ" دِء سندن هَلَه ده ناز هوسیم وار نئیلیم

بالتا قارداش! بیر آز ال ساخلا یامان داشلانیرام

آخی سالخیم سؤیودَم ، یاز هوسیم وار نئیلیم