(شنگولوم منگولوم ناغیلی)

(شنگولوم منگولوم ناغیلی)

شنگولوم،شؤنگؤلوم،منگولوم قاپینی آچین من گلدیم،آغیزیمدا سو ،بوینوزومدا اوت،ممه مده سود گتیرمیشم.

شنگول،شؤنگؤل ،منگول سئوینه – سئوینه قاپینی آچارمیشلار،کئچی ایچری گیریب اونلارا سویونی،سودونی،اوتونی وئریب یئدیریب ایچیردیکدن سونرا یاتیرداردی.سونرا دئیردی کی :بالالاریم احتیاطلی اولون،هر کیم قاپی دویوب منیم دئدیگیم سوزلری دئمه سه آچمایین.چپیشلرده دئییردیلر کی:

- سن آرخایین اول هئچ کیمه قاپی آچماریق.

بیر گون بیرآج قورد اورالاردا تاپلیب کئچینین بالالارین یئمک اوچون فرصت آختاریردی.بیر گون قورد گلیب کئچی ائوده اولمایان چاغ قاپینی دویدو .شنگول،شؤنگؤل ،منگول دینقیلدییا-دینقیلدییا قاپی یا ساری گئدیب دئدیلر:

- قاپی دوین کیمدیر؟

قورد کئچینین دئدیکلرین بیلمیردی و دئدی:- آچین بالالاریم منم آنانیز!

چپیشلر آنالاری اولمادیغینی آنلاییب قاپینی آچمادیلارو قاچیب گیزلندیلر.قورد گوردو کئچی گلیر ،قاچیب بیر بوجاقدا گیزلندی. کئچی قاپینی دویوب دئدی: بالالاریم آچین منم ،اغیزیمدا سو بوینوزومدا اوت ،ممه لریمده سود گتیرمیشم.شنگول،شؤنگؤل ،منگول آتیلا-آتیلا گلیب قاپینی آچدیلار.کئچی ایچه ری  گیریب هر زمانی کیمی بالالارینا سو، سود،اوت وئریب سونرا بالالار قاپینی چالماسینی آنالارینا دئدیلر.کئچی دئدیگی سوزلری قورد ائشیدیب اوردان اوزاقلاشدی.

صاباحیسی گون کئچی گئتدیکدن سونرا قورد گلیب قاپینی دویدی:

- بالالاریم آچین منم آنانیز،آغیزیمدا سو،بوینوزومدا اوت،ممه لریمده سود گتیرمیشم!

شنگول،شؤنگؤل ،منگول گلیب قاپینی آچدیلار ؛بیردن قورد آتیلیب منگولی توتوب همان یئدی.شنگول،شؤنگؤل قاچیب گیزلندیلروآغلاماقا باشلادیلار.آخشام اولوب آنالاری گلیب نه قدر قاپینی دویوب نه قدر قیشقیردی  قاپینی آچان اولمادی.کئچی دال-دالی گئدیب بوینوزلاریلا قاپینی آچیب ایچری گیردی.

شنگول ،شؤنگؤل آنالارین گوروب سئویندیلر و آنالاری سوروشدو :- بس منگول هانی؟ چپیشلر باشلادیلار آغلاماقا و اولان ایشی آنالارینا دئدیلر.آنا کئچی هیرسلنیب دئدی کی:

- یاخشیُ قوردون ایشی من ایلن!.سیز قاپینی باغلاییب هئچ کیمه قاپینی آچمایین.

کئچی یولا دوشوب آز گئتدی،اوز گئتدی ؛دره تپه دوز گئتدی ؛آخیربیر دمیرچی دوکانینا یئتیشیب دئدی:

- دمیرچی قارداش منیم بوینوزلاریمی قیلیچ کیمی ، اوجلارینی سونگی(نیزه) کیمی ائله.

- دمیرچی ده دئدی :آ کئچی سن منه نه وئره جکسن؟

- کئچی دئدی : بیر قازان قایماق بیر قازان سود!

دمیرچی راضی اولوب کئچی نین  بوینوزلارین قیلنج کیمی اوجلارینی سونگی کیمی ایتی ائله دی. کئچیده اونون قایماقین ،سودون وئریب دوز گلدی قوردون ائوینین دامینا چخیب آیاقلارین باشلادی داما وورماقا .قورد بیر قازان آش قویموشدو.اوجاق اوسته بیشیریردی.اوندا کی کئچی آیاقلارین داما یئره ووروردو  قوردون آشینا توپراق توکولوب قورد حیرسلنیب دئدی:

- ائویمی ییخان کیمدیر؟آشیما توپراق توکن کیمدیر؟

کئچی جاواب وئریب دئدی :

- هم سولطان ام هم پاشا ، بوینوزوم قوشا قوشا ، بالالاریمی سن یئمیسن ایندی بویور ساواشا کئچی دالی گئدیب،ائله بوینوزیله ووردو  قوردون قارنینا کی ایکی قاریج قوردون قارنینا ایشله دی. قورد برکدن اولاییب ،یئره دوشوب ،کئچی همان یئرده قوردون قارنین دئشیب منگولونی ائشیگه چیخارتدی. قورد اولویا اولویا دئدی: - وای قارنیم!وای قارنیم! کئچیده دئدی :- بالالاریمی یئینده وای قارنیم دئمیردین! کئچی بالاسین گوتوروب سئوینه سئوینه ائوینه گئتدی؛

- سیزلره ده تانری سئوینج پایی وئرسین. ناغیلی ائشیدن ساغ ناغیلی دیین سالامات